Trump ta menasa pa move partido di Mundial di futbol for di Boston

WASHINGTON - Presidente di Merca Donald Trump no ta exclui posibilidad pa e purba move e partidonan di Mundial di futbol programa pa tuma luga na Boston. E ciudad, dirigi pa e alcaldesa Democratico Michelle Wu, segun Trump, no ta sigur. “Nos por kita nan for di eynan,” Trump a bisa tocante e siete partidonan di Mundial cu mester tuma luga den Gillette Stadium cerca di Boston. “E partidonan ta agota y mi tin cariño pa e hende di Boston, pero nan no tin un bon alcaldesa.” Luna pasa Trump a drenta den un lucha cu e ciudadnan di Merca cu ta dirigi pa Democraticonan. E a manda Guardia Nacional pa Los Angeles y Washington, y tambe tin speransa pa pone militar na Chicago y Portland.

FIFA TA DICIDI

Den principio ta e Federacion Internacional di Futbol (FIFA) cu ta determina unda e partidonan di Mundial lo wordo hunga, pero Trump no ta mira esaki como un obstaculo. E a referi na e bon relacion cu e tin cu presidente di FIFA, Gianni Infantino. “Si algo no ta marchando bon y e situacion no ta sigur, mi ta yama Gianni, e gran hefe di FIFA, y mi ta bisa: ban move e partido. Y nan ta haci esaki tambe.” Infantino a aparece dialuna durante e cumbre di paz den Gaza na Egipto, hunto cu Trump riba e podio.