Tata y gemelonan condena na castigo di prizon den caso di incesto na Rotterdam

DEN HAAG – Na Rotterdam un tata a wordo condena na cinco aña di prizon y TBS cu condicion pa abuso sexual y maltrato di su yiu muhe. Tambe e dos gemelonan di 24 aña di e victima a wordo haya culpabel pasobra nan a abusa sexualmente di dje. Nan a haya te 32 luna di prizon, di cual ocho luna ta condicional.

Den caso di e gemelonan, mescos cu e tata di e famia, un desordo den e spectro autistico a wordo determina. E gemelonan no a haya TBS, pero despues di cumpli su castigo den prizon nan lo tin cu bay na un clinica pa tratamento. 

AMBIENTE CRISTIANO ESTRICTO

E victima a declara cu entre su diesdos y diesnuebe aña, tabata wordo mishi y viola di manera repetitivo. Su tata tambe a batie   regularmente pa dies aña, cu man of cu un palo. E abuso a tuma luga den un ambiente cristiano hopi estricto. E tata pidi su yiu pordon “riba fundamento biblico” despues di un violacion, segun medio Rijnmond.

E tata tambe a isola su yiu for di otro mucha, segun ta lesa den e sentencia di e tribunal. E victima no tabata permiti pa hunga cu otro mucha y, segun e director di su scol anterior, tabata algo cu el a atribui na e influencia di su situacion den cas.