Gobierno Hulandes contra derecho di voto activo pa Hulandesnan biba den Caribe

O’STAD /DEN HAAG  – Gobierno di Hulanda ta consciente di e echo cu tin un defisit democratico den Reino y ta comprende e punto di bista di Raad van State manera a trece dilanti den su conseho na 2024, relacional cu 70 aña di Statuto di Reino. Raad van State ta conseha pa atende cu e situacion aki y ta propone, entre otro, pa amplia e derecho di voto pa medio di duna Hulandesnan biba den Caribe derecho di voto activo den eleccionnan pa “Staten-Generaal” na Hulanda.

Apesar di tin comprension pa e posicion di Raad van State, gobierno Hulandes no por uni su mes cu e proposicion pa soluciona e defisit democratico cu derecho di voto activo pa cuidadanonan cu ta biba riba un di e islanan Hulandes den Caribe. Derecho di voto activo ta inclui e derecho pa participa y keda eligi durante un eleccion. Raad van State ta bisa cu tin diferente forma pa duna contenido na ampliacion di e derecho di voto activo, pero e ta kere cu esun mas realistico ta eliminacion di e prohibicion pa Hulandesnan biba riba un di e paisnan den Caribe participa na eleccionnan pa “Staten-Generaal”, cu ta Parlamento y Senado Hulandes.

Pero, segun gobierno Hulandes, e consecuencia positivo di e solucion aki no ta compara cu e puntonan negativo. Di tur legislacion ta entre 2 pa 3 porciento ta un ley di Reino. Tur sobra legislacion ta relacional cu asuntonan autonomo di Hulanda. Ampliacion di e derecho activo di voto ta duna Hulandesnan biba den Caribe influencia riba e leynan autonomo di Hulanda.

Tambe e por tin consecuencia pa reparticion di asiento y tambe por influencia formacion di un gobierno Hulandes nobo. Gobierno Hulandes ta bisa cu ta bin acerca cu den cuadro di cambio di constitucion na 1983 a decidi pa no duna Hulandesnan biba riba e paisnan den Caribe derecho di voto activo. No tabata haya deseabel cu Hulandesnan tin derecho di voto activo tanto pa “Staten-Generaal” di Hulanda como e Parlamento di e pais den Caribe.

Gobierno Hulandes no ta mira motibo pa na e momentonan aki cambia di huicio riba e punto aki, manera el a trece dilanti den un asina yama “position paper” riba e conseho di Raad van State. Finalmente, gobierno Hulandes ta indica cu e otro ehempel cu Raad van State a presenta, cu ta un Parlamento di Reino separa, no ta realizabel mirando su complexidad y cu mester pasa un trayecto largo pa cambia Statuto di Reino prome cu por realiza esaki.