Ministerio Publico na Hulanda ta busca castigo mas pisa den apelacion pa asesinato di Peter R. de Vries

DEN HAAG Ministerio Publico (OM) di Hulanda ta bai purba e siman aki pa logra cu varios persona involucra den asesinato di periodista di crimen Peter R. de Vries haña pena di prision pa tur su bida. Desde awe, e Hof di Husticia na Amsterdam ta cuminza trata e caso den apelacion. Nuebe homber ta para den tribunal pasobra, segun OM, nan tabata directa of indirectamente involucra den e ehecucion. Tribunal a condena nan anteriormente te 28 aña di prision, pero tambe a declara algun sospechonan inocente.

OM no tabata di acuerdo cu esey y a bai den apelacion. Pa tres di e sospechonan, e fiscalnan tabata exigi pena di prision pa tur su bida.

UN BUELTA INESPERA

Ta casi cuater aña pasa desde cu Peter R. de Vries a wordo tira den centro di Amsterdam. “E asesinato di mi tata ta algo cu mi ta pensa riba tur dia,” su yiu Royce de Vries a conta recientemente den programa RTL Boulevard. Durante e programa di television, Peter R. de Vries tabata un di e invitadonan riba 6 di juli 2021, poco prome cu el a wordo tira. Nuebe dia despues, De Vries a fayece. Tres kwart di ora despues di e tiroteo, polis ya a aresta e tirado y su chauffeur. E arma di crimen tabata ainda den nan auto, hunto cu telefonnan yena di mensahe cu prueba di e atentado. Por lo tanto, tabatin prueba mas cu suficiente. Poco prome cu tribunal tabata bay duna su sentencia contra e dos persona, e caso a tuma un buelta inespera. OM a presenta un testigo anonimo cu tabata sa mas tocante otro persona involucra. E declaracionnan di e “testigo 5089” a yega na varios arresto nobo.

Tribunal a wordo obliga pa pospone e sentencia, y e cantidad di sospechonan a subi di dos pa nuebe. Pa motibo di e investigacion nobo, y tambe salida di un di e hueznan, e proceso a tin cu cuminza den gran parte di nobo.