Desaroyonan geopolitico ta keda punto di preocupacion na IPKO

WILLEMSTAD /DEN HAAG – E reunion di cumbre interparlamentario cu recientemente a tuma luga na Hulanda (IPKO)  a yega na un fin. Na final di e cumbre aki a yega na un lista di palabranan cu paisnan den Reino lo bai traha riba dje pa wak te con leu por yega cu e deseonan ey. Na final di e IPKO aki a duna un recapitulacion di loke a socede na Hulanda.

E encuentro aki a bai acompaña cu diferente bishita na entidadnan di importancia. Entre otro a hasi un bishita di trabou na Haagse Hogeschool. Aki nan a haya un presentacion y splicacion riba e posibilidatnan di sigui estudio e.o. den Asuntonan di Reino, cu ta un estudio cu a wordo crea pa motibo di un falta di conocemento serca studiantenan y amtenarnan riba asuntonan di Reino. Mas aleu tambe a haya un presentacion relaciona cu e exito di parti di studiantenan den Caribe Hulandes. A trata aki no solamente dje exito di studiantenan sino tambe nan bienestar.

A yega na un palabranan cu e siguiente tema cu a wordo atende den e IPKO ta: “Papiamento como idioma di instruccion den enseñanza: oportunidad, desafiamento y experiencianan den practica.”

DESAROYONAN GEOPOLITICO

E tema di geopolitica no a laga di ta forma parti di e deliberacionnan. Durante e bishita aki parlamentarionan a haya presentacionnan relaciona cu desaroyonan geopolitico y nan influencia den Reino y tambe e dependecia di e partinan Caribense den Reino di desaroyonan foraneo.

Mester bisa cu serca e partinan Caribense den Reino e desaroyonan aki ta motibo di basta preocupacion, pa motibo cu riba propio forsa nan no por haci hopi. Banda di esey tin preocupacion tambe relaciona cu entrada di un cantidad di hende indocumenta den e paisnan. E motibonan por diferencia, pero e fluho ta bai acompaña cu trafico di hende, explotacion di migrantenan y trafico di droga.

Pa e paisnan cu ta depende hopi di turismo como nan fuente principal di entrada, e desaroyonan aki no ta deseabel, ya cu e ta tacha nan nomber como destinacion di tranquilidad y seguridad.

Finalmente a dicidi di mantene e punto aki como uno di importancia pa e siguiente IPKO. Na e ocasion ey lo regla pa duna un presentacion tecnico riba e situacion di seguridad den area di Caribe y e forma con Reino ta tene cuenta cu ne y anticipa riba e desaroyonan.