Verstappen ta gana y domina na Formula 1 di Baku

BAKU -   Despues di un kwalificacion caotico, Max Verstappen a bira señor y maestro den e careda di Baku diadomingo, unda el a logra su 67e victoria den Formula 1.

"Tabata un wikend maravilloso. Cuminsa riba pole (prome)  tabata e clave. Asina mi por a warda e tirenan y asigura cu mi por sigui largo riba e tire duro."

Verstappen a bisa cu e desicion pa cuminsa riba e tire duro tabata "riesgoso", pasobra ta tuma mas tempo pa e yega na temperatura. 

"Despues di binti buelta el a sinti bon. Mi ta pensa cu tabata e estrategia corecto. Nos a keda riba pista te cu casi tur hende a haci nan pitstop."

"Ta hopi inusual, dos victoria consecutivo. E auto no a core nunca asina bon manera na Monza y Baku," segun Verstappen, 

cu dos siman pasa na Italia tambe a gana for di poleposition. 

"Esakinan ta circuitonan unda hopi bez nos no tabata fuerte. Esey ta bisa hopi y ta duna e team un boost."

E desventaha di Verstappen contra líder di mundial Oscar Piastri – cu den prome buelta a destrui su auto y a cay afo – ta awor 69 punto. 

Verstappen no kier spera ainda riba un desenlace emocionante den lucha pa titulo.

"Ainda ta hopi punto, e diferencia. Mi ta wak carrera pa carrera, y na Abu Dhabi (e ultimo carrera di e temporada) lo nos mira con ta caba."