FAA ta celebra luna di conscientisacion riba Trastornonan Neuro-Cognitivo

ORANJESTAD - Fundacion Alzheimer Aruba (F.A.A.) ta celebrando su 24 aniversario di Luna di Conscientisacion riba Trastornonan Neuro-Cognitivo, e.o.: Alzheimer, Frontotemporal, Vascular, Curpa di Lewi, Parkinson, etc. E luna di conscientisacion a cuminsa dia 1 di september. W.E.B. Aruba N.V. a bolbe dorna e rotonde na Balashi cu cintanan y cu lus den den colo di Teal. Esaki pa enfatisa y yuda conscientisa comunidad riba e posibel causa y consecuencia di e malesanan of trastornonan neuro-cognitivo y degenerativo, di cual malesa di Alzheimer ta esun mas frecuente y cu mas a haci investigacion riba dje.

E aña aki F .A.A. ta enfoca riba tres (3) fenomeno importante den e charlanan cu ta duna na instancianan:

1. Seguridad di e pashent: Importancia di un diagnostico confiabel pa su seguridad;

2. Señalnan tempran di Trastorno Neurocognitivo Frontotemporal;

3. Sindrome di stress di e Cuidado.

Si un instancia tin necesidad pa programa un charla, por yama F.A.A. na 592 8416.

Dia 21 di September a wordo declara pa Organisacion Mundial Di Salud (OMS/ WHO) di Nacionnan Uni / United Nations na 1994 como ‘Dia Mundial di Conscientisacion’ riba malesanan neurocognitivo, manera e tipo Alzheimer y Fronto-Temporal. Henter comunidad ta wordo invita pa asisti na un Santo Sacrificio di Misa, diadomingo 21 di september venidero, luga y ora ta wordo anuncia pronto.