Paisnan miembro di CELAC ta preocupa pa presencia militar extra regional den Caribe

CARACAS - Paisnan miembro di Comunidad di Estados Latinoamericanos y Caribeños (CELAC) a expresa nan preocupacion grandi diabierna, pa motibo di e despliegue militar extra-regional recien den region.

Antigua y Barbuda, Barbados, Belice, Bolivia, Brasil, Chile, Colombia, Cuba, Dominica, Granada, Guatemala, Honduras, Mexico, Nicaragua, San Cristobal y Nieves, Santa Lucia, San Vicente y Las Granadinas, Surinam, Uruguay y Venezuela a recorda cu America Latina y Caribe a wordo proclama como Zona di Paz. E compromiso aki ta basa na principio manera no uso di fuerza, solucion pacifica di controversia, promocion di dialogo y multilateralismo, respeto pa soberania y integridad territorial, no injerencia den asuntonan interno y derecho di autodeterminacion di pueblo.

TRATADO

E paisnan a resalta tambe cu e Tratado di Tlatelolco, pa proscripcion di arma nuclear den America Latina y Caribe, tabata un paso historico cu a converti region den e prome zona densamente poblado sin es tipo di armamento. E tratado aki ta refleha deseo di pueblo pa paz, seguridad colectiva y proscripcion total di arma nuclear como medio di amenaza. Ademas, e paisnan a reconoci cu crimen organiza transnacional y narcotrafico ta un amenaza serio contra desaroyo di sociedad pacifico. Por lo tanto nan a reafirma nan voluntad pa combati e fenomeno aki, aumentando cooperacion y coordinacion regional e internacional, den respeto cu Derecho Internacional y cumpli cu lei y convenio internacional vigente.

Paisnan firmante di CELAC a hasi un yamada pa promove un ambiente sigur y ta repiti nan compromiso firme cu defensa di paz, stabilidad, democracia y desaroyo den tur region.