Despues di 20 aña sirbiendo nos pais, Ady Thijsen (MEP) ta retira di politica

Despues di 20 aña sirbiendo nos pais, Ady Thijsen (MEP) ta retira di politica

Posted on 09/4/2025 10:09 am AST | Updated on 09/4/2025 10:10 am AST

ORANJESTAD – Diasabra dia 30 di Augustus, na cede di MEP, partido MEP hunto cu su sostenedornan a rindi homenahe na señor Ady Thijsen. Lider di partido Evelyn Wever-Croes a expresa cu Ady no solamente tabata un candidato riba lista di MEP, sino e ta un bon politico, un bon amigo y un bon compañero di partido.  Despues di a sirbi su pais pa 20 aña como politico, señor Thijsen ta retira poniendo asina un punto na final na su carera poltico. Den su discurso, lider di partido a bisa sr Thijsen pa no pone un punto sino un coma, pa asina partido MEP por sigui conta cu su experiencia, consehonan y sosten cu semper tabata di gran ayudo. 

Señor Thijsen durante e añanan como representante di pueblo a sirbi Aruba den varios posicion. E tabata presidente di Parlamento, parlamentario, lider di fraccion, representante di Aruba na Union Europeo, y Minister Plenipotenciario na Hulanda.   “Mi tabata tin e honor di ta presente e dia cu el a wordo presenta como Minister Plenipotenciario na Hulanda y mi tabata tey dia cu el a tuma despedida tambe. Mi ta hopi impreciona di e “netwerk” cu señor Thijsen a laga atras, paso no solamente el a sera relacionnan importante pero el a crea un brug pa Aruba.  E ta di lamenta cu awe ainda no tin un Minister Plenipotenciario na Hulanda paso e ta haci Aruba daño. Pero esaki ta e escohencia di e Gobierno actual. Ady a haci un bunita trabou pa Aruba, y p’esey e famia di MEP a bin hunto pa gradici’e y pa dun’e e honor cu el merece. Un biaha mas Ady, danki pa a sirbi nos partido, y danki pa a sirbi Aruba” lider di partido Evelyn Wever-Croes a expresa. 

  • Powered by SETAR