Rubio: Intercepta cargamento di droga ‘ya no ta traha’ y Merca lo sigui ataca e cartelnan

Rubio: Intercepta cargamento di droga ‘ya no ta traha’ y Merca lo sigui ataca e cartelnan

Posted on 09/3/2025 3:45 pm AST | Updated on 09/3/2025 3:45 pm AST

WASHINGTON - Merca a afirma diaranson cu nan a destrui un boto den Caribe cu supuestamente ta pertenece na e grupo criminal venezolano Tren di Aragua.

E secretario di Estado mericano, Marco Rubio, a bisa diaranson cu intercepta cargamento di droga “ya no ta traha”, y pa motibo ey su pais lo sigui cu e ataque contra e cartelnan, un dia despues cu Merca a afirma cu nan a destrui un boto den Caribe cu supuestamente ta pertenece na e grupo criminal venezolano Tren di Aragua.

E presidente Donald Trump “a haci esey y lo bolbe hacie. Quizas ta pasando mes riba e momentonan aki”, asina Rubio a bisa den un conferencia di prensa na Ciudad di Mexico despues di un reunion cu e presidenta mexicano, Claudia Sheinbaum, pa trata cooperacion den seguridad.

Rubio a insisti cu e ataque di diamars a tuma lugar “den awa internacional” y a bisa cu e cartelnan “ta gana mil miyon di dollar” cu nan operacionnan y cu “nan no ta importa” e perdida cu e interceptacionnan ta causa, y pa motibo esei ta nesesario pa usa fuerza pa disuadi trafico di narcotico.

E secretario di Estado a recorda cu e Gobierno di Donald Trump a designa e grupo aki como “narcoterroristanan” y cu lo actua pa eliminá e trafico di droga cu ta amenaza Merca.

E bishita di Rubio ta sosode den mitar di un ofensiva grandi di Washington contra narcotrafico na nivel transnacional, cu a causa despliegue di un gran contingente militar den Caribe, e mes cu a destrui e embarcacion cu, segun Merca, tabata pertenece na e banda criminal transnacional di origen venezolano Tren di Aragua.

E accionan di Washington a provoca condena di e autoridadnan venezolano, cu a acusa Merca di kier forza, cu e operativo aki, un derrocamiento di e Gobierno di e presidente venezolano, Nicolas Maduro.

E BISHITA DI MARCO RUBIO NA MEXICO

E secretario di Estado di Merca, Marco Rubio, a bisa diaranson cu no tin nacion cu ta colabora tanto den seguridad cu nan pais manera Mexico y a gradici e presidenta, Claudia Sheinbaum, pa e trabou conjunto den e materia aki.

“No tin gobierno riba e momentonan aki cu ta cooperando cu nos mas den e lucha contra criminalidad cu e Gobierno di Mexico, e Gobierno di e presidenta (Claudia) Sheinbaum y nos ta gradici esey hopi y tin hopi cos pa haci hunto”, asina a bisa e funcionario mericano durante un conferencia di prensa na Cancilleria mexicano.

Rubio a haci un bishita oficial na Mexico, unda el a tene un reunion cu Sheinbaum y cu e canciller mexicano, Juan Ramon di la Fuente, den cual nan a discuti tema manera cooperacion den diferente area, cu enfasis especial riba e lucha contra crimen organizá, den un momento unda Washington a redobla su ofensiva contra e cartelnan di droga.

E secretario a duna credito na e presidenta mexicano pasobra, segun e, den su administracion nan a “trata temanan cu hopi tempo no a wordo trata”, manera e 59 delincuentenan di alto nivel cu tabata requerí pa Washington, tabata tene cargo pa narcotrafico y cu a wordo entrega na Merca.

E funcionario di Merca a bisa cu e presidenta mexicano a papia riba e tema aki cu e presidente mericano, Donald Trump, y cu “hopi cos a logra”, pero el a enfatisa cu nan lo sigui intercambia ideanan y coopera.

  • Powered by SETAR