• Front Page
• Politica
• Local
  • Social
  • Polis
  • Corte
  • Economia
• Internacional
  • Corsow
  • Region
  • Hulanda
• Deporte
• English
• Opinion
• Live

• Front Page
• Politica
• Local
  • Social
  • Polis
  • Corte
  • Economia
• Internacional
  • Corsow
  • Region
  • Hulanda
• Deporte
• English
• Opinion
• Live

Analisis: Con ta celebra Dia di Prensa?

Scirbi pa Tito Laclé

Awe nos ta celebra otro ‘Dia di Prensa’. Y manera tur aña tin e dilema, kico tin cu sinti y haci riba e dia aki. Y cu esey, mi kier men, nos como prensa. Celebra? Goza, bebe? Of reflecciona? Y con? Ora cu otro instancianan ta tene nan dia, manera Dia di Labor, sindicatonan ta opta hopi biaha, pa ‘refleciona’, tene un marcha of haci algo por el estilo. 

Ami lo atende e situacion actual di prensa, con e situacion ta, y kico tur e ta encera. 

Pa cuminsa, con mi ta celebra dia di prensa? E ta un dia normal, den sentido di trabou. E no ta un dia liber, a lo menos cu e cay riba un weekend, y asina mes Dios sa cu mayoria di nos ta sigui traha. 

Algun ta considera e dia como uno di protesta, ya cu den nan bista, ‘no tin nada pa celebra’, ya cu e trato y respet cu prensa ta haya, sea di gobierno of otro instancia, ta riba un nivel hopi abou, of casi no existente. Otronan, ta sinti cu e ta un dia pa reflecciona, y cada un ta hacie den nan forma. Y tin e parti unda cu tur aña tin e dilemma entre colega, con pa atende cu e atencion cu comercio ta duna nos riba e dia aki.  Laga mi splica..

A bira un custumber, cu varios comerciante, y negoshi, ta haya cu ta un bon momento pa ‘reactiva’ e laso cu prensa, of ‘premia’ prensa pa e ‘bon trabou cu nos ta haci di informa nos comunidad dia aden, dia afo. Y nan ta haci esaki hopi biaha, cu tur bon intencion, inundando nos cu n of otro‘regalito’, of ta invita nos pa un of otro evento , cu por ta un simple agasaho cu snacks y drinks, of ta organisa un evento completo di placer, pa nos ‘relaha’ y tur esaki, como ‘reconocemento’ pa nos trabou duro di tur dia. Ta comprendible cu comercio kier capitalisa riba esaki. Por wak e cu varios wowo. Kier tene prensa como ‘amigo’, ‘contacto’, y algo mas? Y aki ta unda cu e dilemma ta cu varios colega. E problema ta cu ora cu invitacion drenta, antes, tabata ‘verwacht’ un cobertura tambe. Awendia cu Social Media, nan mes (comercio) ta zorg pa esaki, y nos por ‘goza sin traha’. Dus varios ta lage na nos, mientras cu ainda otronan ta ‘verwacht’ un cobertura, y otronan ta bisa ‘laga material di trabou na oficina, y djis bin goza’. Hopi di nos, ta atende e eventonan, cu berdad ta hopi interesante, y ta un chens pa nos connect cu otro, sea colega cu colega, den un ambiente gezellig, of pa djis relaha. Unda e problema ta e ora, bo ta puntra? Laga mi splica. 

Tin algun (colega) cu ta sinti cu si un comerciante of negoshi cu invitabo of dunabo regalo, cu den cierto sentido, e ta cumprando bo y bo medio.

Prensa no mester wordo cumpra, esey ta e pensamento. Noticiacla, ta participa na e actividadnan, ta ricibi e ‘regalonan’, pero esey no kier men cu e ta cumpra!. Ta keda na cada uno pa kere esaki of no. 

E ta un situacion poco ‘confuso’. Pasobra prensa, mester biba di entrada comercial. Esey ta de facto paga bo salario. Tur medio tin propaganda, sin excepcion. Esey kier men cu nan ta cumpra? No. Noticiacla a bisa esaki na su lansamento 11 aña pasa. Y berdad, tabatin comerciante cu a purba di haci fastioso, ora cu pa un of otro motibo, nan a bira ‘noticia’, y no tabata kier pa nos raporta e situacion. Tin cu a keda cu nos, y otronan, wel, no ta mas cu nos. Nos pensamento na noticiacla ta: Si bo a bira e noticia, nos ta raporta e hechonan. Manera cu nos a haci semper, cu tur hende, tur ora. Atrobe, si bo kier kere of no, esaki ta nos practica. No ta pasobra bo ta pone aviso cerca nos, kier men cu bo a cumpra nos. Nos ta hopi cla riba esey. 

Awor, pakico ta acepta regalo y bay e eventonan? Pasobra nos ta agradecido pa e atencion, y nos sa con pa maneha e situacion di un manera corecto. Con otro medionan y coleganan di prensa ta actua cu esaki, ta nan decision y nan maneho. Cada ken tin e derecho pa haci esey. 

Awor, pa e dia mes. Mi lo dedica un otro editorial na e parti ey. Pa aworaki, pabien pa mi coleganan den prensa, cu nan dia.