MEP: AVP y FUTURO a scohe e peor momento pa yega na acuerdo cu Hulanda

ORANJESTAD - AVP y FUTURO a scohe e peor momento pa yega na acuerdo cu Hulanda. Asina e partido mas grandi den oposicion, MEP ta bisa. Esaki despues cu a tuma nota cu diabierna ultimo, Hulanda a anuncia cu a acepta e ley manera cu Aruba a mande pa nan, pa loke ta supervision financiero. Sin cu esaki a pasa Parlamento di Aruba. Locual hopi ta considera un eror strategico di AVP y Futuro, y otronan ta considera eror di principiante. Ademas, e concepto di ley cu ministernan Eman, Wever, y Croes a entrega na Parlamento diabierna, ta mustra cu e ministernan sea no a negocia, of nan no a logra net nada den nan negociacion cu Hulanda. Pasobra, segun MEP,  8 siman pasa e comision di ambtenaar cu a negocia, a duna Parlamento un ultimo status di e negociacion. Cu esey e comision ey a keda cla cu su trabou, y e sigiente paso lo tabata negociacion entre e ministernan Eman, Wever, Croes y e Secretario di Estado. Pero nada a cambia mas! 

Parlamento a pidi gobierno pa enfoca especialmente riba dos punto. Uno ta trata un areglo husto pa Aruba sali di e rijkswet, si yega asina leu. Y e otro ta pa ancra den ley, cu Hulanda lo financia demas debenan, entre otro e debe cu sr Mike Eman a crea na 2015, na interes abou. 

Ningun di dos a wordo teni cuenta cune. “Nos conclusion ta cu e ministernan Eman, Wever y Croes no a negocia fuerte suficiente y no a logra net net nada”. 

PEOR MOMENTO

“Hulanda su gobierno na e momento aki no ta simplemente demisionario. E gobierno ta conta cu sosten di apenas 20% di asiento den Tweede Kamer y no tin afinidad cu nos islanan” MEP a finalisa bisando.