Problema entre dos primo ta resulta den un final mortal

SANTA CRUZ – Problema entre dos primo diasabra mainta, a resulta den un final mortal na Coba Lodo. Diasabra mainta pa 6:07 central di polis a wordo informa di un caso cu a tuma lugar dilanti un cas na Coba Lodo y cu lo a scucha tironan. E prome informe tabata cu lo tin un hende homber band’i  caminda  cu no ta reacciona. Central di Polis ta despacha patruya y ambulance cu maximo urgencia na e sitio.

HOMBER NO TABATA REACCIONA

Na yeganda polis ta topa enberdad cu un hende homber band’i caminda na suela y no tabata reacciona. Ambulance ta yega na e sitio pero lamentablemente no por a haci nada mas pa e victima. 

Polis technico, recherche, fiscal, departamento di slachtofferhulp como tambe dr.Forensico a presenta na e sitio. 

Dr. Voskuil ta constata morto di e victima e hende homber Rene J. Paesch naci na Aruba 30 december 1990 (34 aña). CONFISCA E CURPA

E curpa a wordo tuma den beslag y e investigacion ta den man di recherchenan pa sa kico exactemente a sosode. Segun polis, t’e cu awor no por bisa dor di kico e victima a fayece y investigacion lo mester saca afor esaki. Ta mustra sinembargo segun informacion di Noticiacla, cu por ta un caso di reglamento di cuenta cu por a termina den un caso di asesinato. 

DETENCION 

Tambe na e sitio a detene un hende homber relaciona cu e caso aki. Tambe un auto y un brommer a wordo confisca y hiba warda di polis pa mas investigacion. 

Cuerpo Policial ta haci un apelacion si abo a wak of sa algo pa yama e tiplijn di polis cu ta 11141. 

Bo ta keda anonimo. 

Noticiacla y Cuerpo Policial Aruba ta manda palabra di condolencia na famia di e fayecido.