OM: Den caso di incidente di mordida di cacho, lo persigui e doño di e cacho

ORANJESTAD - Ministerio Publico ta persigui en principio tur doño di cacho despues di un incidente di mordida, una vez Polis of otro cuerpo di investigacion traha proces-verbaal. Asina Ministerio Publico a bisa diahuebs merdia den un comunicado. No a bisa si, si esaki ta relaciona cu un of otro incidente specifico, cu lo a sosode, of si esaki ta djies un recordatorio. 

E maneho aki ta valido desde prome di januari 2023 y ta wordo aplica independientemente di si e victima ta un persona of un bestia (su doño).

Cu e maneho aki Ministerio Publico ta busca pa enfatisa e responsabilidad di doñonan di cacho. 

Na mes momento, Ministerio Publico ta traha pa baha e cantidad di incidente di mordida y pa fortifica seguridad di ciudadanonan y di bestianan en general.