Herde: Ta prerogativa di gobierno ken ta nombra den hunta di comisario di su companianan

ORANJESTAD – Ta gobierno su prerogativo ken e ta nombra como comisario den hunta di comisario den su companianan, segun minister Rene Herde a bisa diaranson mainta durante tratamento di e presupuesto supletorio 2025. “Esey no kier men cu nos ta manda”, Herde a bisa mesora. Pero e la bisa si cu no ta asina cu tin un solicitud habri pa nombra un persona como comisario. Lo sigui e procedura existente. Segun Herde, mayoria di e candidatonan pa comisario no ta selecta ainda. Cada compania ta un tiki diferente y tin su exigencia, segun e minister. Lo aplica profile unda cu ta existi y unda cu no tin esey, lo aplica regla di bon gobernacion. Cu esaki, e la contesta pregunta di e.o. parlamentario Dangui Oduber riba e tema. A sigura cu lo busca hende cualifica pa e funcion specifico.