VIDEO: Concepto nobo di rijkswet pa supervision financiero casi cla pa keda presenta

ORANJESTAD – E concepto di ley di Reino (Rijkswet) riba supervision financiero dentro di poco lo keda presenta pa aprobacion. Asina e secretario di estado hulandes Eddie van Marum a bisa Noticiacla e siman aki durante un conferencia di prensa riba su bishita. Segun van Marum, durante su bishita relampago, a trata e tema aki y por bisa cu pronto por presenta un concepto. Ora cu e periodista Laclé a presiona e mandatario pa un contesta mas concreto, e mandatario a bisa solamente cu ‘pronto’. Y for di e posibilidadnan menciona, ta mustra cu dentro di un of dos luna caba, por spera un resultado. Mientrastanto, Aruba ta pagando un tasa halto di interes. Riba e pensamento di  e gabinete actual, specificamente partido AVP su lider Mike Eman, van Marum no kier a bisa nada riba e idea di cambia e debe, den un fondo di inversion. Den pasado recien, su predecessor, Szabó a rechasa rotundamente pa duna oido na e idea aki. Solamente si Aruba mes financia e fondo aki completamente, Hulanda lo tin oido pa esaki.