Ex CEO di supermercadonan Jumbo condena na dos aña di prison pa labamento di placa

AMSTERDAM – Frits van Eerd, ex gerente general di e cadena di supermercado Jumbo, a wordo condena na 24 luna di prison. Corte na Groningen a dicta awe tardi cu e director di supermercado desgracia tabata culpabel di labamento di placa. E la hasta defrauda su mes compania pa medio di falsificacion.

E castigo ta mas halto cu e exigencia di Ministerio Publico, cu tambe a exigi un castigo di dos aña, pero cu ocho luna suspendi. E co-acusado Theo E. a wordo condena na 3.5 aña di prison door di Corte.

Na 2022, polis a haña €450.000 na cen cash den cas di Van Eerd durante buskeda di cas, cu e la ricibi durante añanan for di e bendedo di auto E. Corte a dicta cu Van Eerd tabata sa cu e suma grandi di placa aki ta origina di actividadnan criminal.

Durante e huicio, su abogado a entrega declaracionnan di amigonan y famia tocante e origen di e €446,000 na cen cash haña na su cas. Hues a haya e declaracionnan aki implausibel y inverificabel. Caminda nan por a wordo verifica, e declaracionnan a resulta di ta falso den mayoria caso.