Aruba y Colombia kier fortalece laso comercial, logistica maritimo y desaroyo agricola

ORANJESTAD - Gobierno di Aruba kier profundisa e relacion existente y formalisa cooperacion structural cu Colombia riba importancia strategico manera comercio, logistica maritimo y desaroyo di e sector primario. Dialuna ultimo, Minister di Finansa, Asunto Economico y Sector Primario, mr. Geoffrey Wever, a tene un encuentro   cu Sra. Carolina Olarte Bácares, Embahadora di Colombia pa Reino Hulandes, Sra. Patricia Cortes,  Directora Europeo di Emabahada di Colombia, Sr. Gustavo Serrano Amaya, Consul di Colombia y Capitan di e Buque ARC Gloria, Sr. Luis Fernando Lara Coqollo. “Nos kier traha riba un base concreto pa mehora importacion y exportacion, pa beneficio di negoshinan chikito y pa crea mas oportunidad pa empresarionan Arubano,” Minister Wever a bisa. “Aruba su presencia permanente mediante Holland House na Bogotá y e interes creciente di empresanan Arubano pa haci negoshi cu Colombia ta refleha un deseo real pa expande nos laso comercial cu e pais bisiña. E misionnan comercial exitoso na 2023 tabata solamente un comienso,” Minister Wever a sigui bisa. 

Aruba kier relansa e cooperacion den e sector primario, specificamente riba importacion di carni, industria di pesca y coneccion mas frecuente y structura via lama cu Colombia. Esaki ta brinda oportunidad pa Colombia tambe pa por haci uso di Aruba, como e isla mas cerca di Colombia, pa drenta otro islanan den Caribe y expande nan mercado.

Embahadora Olarte Bácares a expresa su interes continuo pa fortalece e relacion cu Aruba, indicando e potencial real pa cooperacion riba tereno comercial, logistica, produccion, turismo y deporte.