ATA, EPI y SEPB a firma acuerdo strategico pa stimula educacion culinario

ORANJESTAD- Diamars mainta, Minister di Turismo mr. Wendrick Cicilia tabata presente durante e cereomonia oficial di firmamento di acuerdo strategico entre ATA- EPI y SEPB pa stimula educacion culinario, cu a tuma luga den e auditorium di Colegio EPI. E plan ambicioso aki, impulsa den colaboracion entre institucionnan educativo clave manera EPI y EPB, ta busca pa fortalece e educacion culinario na Aruba y na mes momento atende un necesidad critico: prepara nos forsa laboral pa e retonan di futuro. 

 E PLAN 

E Plan pa Stimula Educacion Culinario 2025 ta contempla un variedad di iniciativa manera tayernan practico, experiencianan educativo internacional, evento estudiantil y lesnan excepcional duna door di e expertonan den e sector. E accionnan aki no unicamente ta enrikece conocemento, sino cu tambe ta conecta e studiantenan cu e mundo laboral real desde un etapa trempan. 

SOSTENIBILIDAD LABORAL

“E plan aki no ta trata unicamente di excelencia culinario; e ta trata di sostenibilidad laboral. E ta un brug entre educacion y labor, y ta un ehempel cla di con Gobierno di Aruba, educacion y sector priva por traha hunto pa forma un forsa laboral cu ta prepara, motiva y orguyosamente local”, tabata expresion di Minister Wendrick Cicilia.