Minister Croes a dispidi di studiantenan cu a biaha pa Hulanda pa sigui nan estudio

ORANJESTAD  –   Minister di Educacion mr. Gerlien Croes, a dispidi di e studiantenan cu dialuna a biaha pa Hulanda pa inicia nan estudio avansa. E la desea nan exito y motivacion. E mandatario a recorda cu e decision pa studia leu for di cas no ta facil, pero ta demostra balentia, pasion y un gran deseo pa crece. E minister a expresa su admiracion pa tur studiante y ta splica cu cada paso cu nan ta tuma den e trayecto aki ta un aportacion valioso pa nan mes y pa futuro di Aruba. “Laga boso pasion sigui guia boso caminda, boso disciplina y esfuerso sostene boso den momento dificil, y boso meta keda inspira boso pa sigui crece y ta exitoso”, Minister Gerlien Croes a subraya.

Minister Gerlien Croes a expresa su agradecimento profundo na e mayornan, famianan y amistadesnan tambe, nan cu ta motiva y para tras di cada studiante. Nan amor y sosten ta e columna riba cual e estudiantenan por conta, den alegria y reto. “Na e mayornan, danki pa boso guia constante. Boso forsa y apoyo ta fundamental pa nos hobennan por logra nan meta y bira e profesionalnan di mañan”.