Oficina di ONU na Aruba pa refugiados, ta cera oficina fin di augustus

ORANJESTAD – Debi na retonan di financiamento mundial cu ta afecta operacionnan humanitario rond mundo, UNHCR, e Agencia di Nacionnan Uni pa Refugiado, lo cera su oficina na Aruba entrante 31 di augustus 2025, debi na e situacion financiero actual di e organisacion.

Durante un mision recien na Aruba, José Egas, UNHCR su Representante Multi-Pais pa Belize, Cuba, Nicaragua, Panama, y Caribe Central y Sur, a reuni cu funcionarionan di gobierno, refugiadonan, organisacionnan di sociedad civil, y partnernan clave strategico y di ehecucion, incluyendo e Fundacion Contra Violencia Relacional, e Sociedad di Venezuela, y e Fundacion Arubano Centro di Desaroyo. E bishita a busca pa fortalece esfuersonan di defensa y explora strategianan pa mehora e proteccion di personanan desplasa forsadamente.

“Aunke nos ta cerando nos oficina di pais na Aruba, nos solidaridad cu personanan desplasa y nan famianan ta keda fuerte,” asina Egas a bisa. “Nos lo sigui traha estrechamente cu partnernan y Gobierno, sosteniendo acceso na servicio esencial y solucionnan a largo plaso.”

Desde cu a establece su presencia na Aruba na 2018, UNHCR, den colaboracion estrecho cu Gobierno, sociedad civil, y partnernan di Nacionnan Uni, a sostene e sistema di asilo, servicionan di proteccion, entre otro asistencia huridico, a fortifica structuranan di comunidad, y a brinda asistencia directo na gruponan vulnerabel, entre otro hende muhe y mucha muher. Desde 2022, UNHCR i su partnernan a konsehá mas ku 6.000 hende a traves di e inisiativanan aki.