Señora haitiano di edad ta fayece den un cas na Madiki cu a pega candela

ORANJESTAD – Un señora di edad a fayece den un cas na Madiki cu a pega candela diadomingo marduga. Tabata pa 1 or y 26 di marduga cu  central di polis a wordo notifica di un candela na un cas na Madiki. 

A despacha patruya di polis y brandweer. Na yegada di patruya, a topa berdad, cu un cas na candela. Brandweer tambe ta yega na e sitio y a cuminsa mesora na combati e candela.

Un rato despues a bin compronde di esnan cu ta biba eynan y rond den vecindario cu aparentemente tabatin un señora den cas ainda. 

Brandweer a logra paga e candela y despues a bay controla den  cas y a bin topa cu un curpa sin bida. 

Di biaha a pone recherche, polis technico,Slachtofferhulp como tambe e dokter forensico na altura. 

E victima ta un hende muher di inicial Clomene Pierre naci na Haiti dia 6 juli 1960. 

Cuerpo Policial ta manda palabra di condolencia na famia di e fayecida.