Friccion den partido pa con Herde ta maneha cartera contra gusto di de Meza

ORANJESTAD – Cos no ta ‘koek en ei’, den seno di partido berde, esta AVP no obstante cu a keda cla cu e asunto di e di 7 minister pa e partido. Noticiacla a compronde di su fuentenan cu internamente, cos no a keda bon toch, y cu aworaki tin problema entre de Meza y Herde, pa motibo di supuesto palabracionan haci cu no ta wordo cumpli. Durante e noticiero Enfoke diahuebs merdia, e periodista Patrick Paskel tabata prome pa haci e mencion di e situacion, dentro di e partido y cu cos no ta bon.

KICO TA E PROBLEMA

E problema parce ta cu ora cu a postula Rene Herde pa ‘reemplaza’ de Meza, cu de Meza lo a haya chens pa influencia e cartera door di den cierto forma, pasa su ideanan di maneho pa Herde, y cu esaki lo a bay tambe cu ‘su hendenan’, esta hendenan di de Meza, cu lo mester a bay traha cu of pa Herde. De echo, e palabracion tabata cu Herde lo a ‘keinta banki’ pa de Meza, mientras cu e ta regla su asuntonan legal, pa despues bin bek y haya e funcion di minister. E funcion pa Herde, ta ‘temporal’. Y tabatin un bon entendimento riba esaki. Kico a bay robez awor? Ora cu ‘puntje a kom bij paaltje’, cos no a bay of ta bayendo manera cu a palabra. De Meza lo no ta hayando oido, y cu Herde tampoco ta  tumando e hendenan di de Meza, manera palabra. A compronde cu contrario na e palabracion, cu no ta ‘sin mas’ Herde lo ta tumando e hendenan di de Meza. Y esey lo a causa iritacion cerca de Meza y den su campo. 

KICO ESAKI KIER MEN

Loke esaki kier men, ta cu de Meza a informa internamente y a laga sa cu e no ta contento y cu si despues di recess, cos no drecha, cu ainda e tin e plan di ‘bula afo’, y cu esaki por tin consecuencia. Noticiacla a compronde cu ora cu e noticia aki a plama ayera merdia, partido berde a core scramble, pa wak si por remedia e situacion, pa evita cu e por escala. Si mainta cos tabata mustra hopi scur, pa atardi, a purba ‘trankilisa’ e situacion pa e no crea un bida mas grandi cu por rementa asina luna nobo (augustus) habri. 

PARTIDO INTERNOLoke si ta un echo, ta cu cos no ta bon ainda den e partido y, cu relacionan ta ‘rommelig’ ainda. Falta hopi pa drecha y remedia y e no ta bayendo ‘smooth’ dentro di e partido berde. Cu si e ta desemboca den un partida di de Meza, no ta conoci. Pero te cu ayera mainta, esey tabata e menasa cu a cay, cu a gara e partido di tal forma, cu ta purbando aworaki pa ‘trek cos recht’, y evita un que otro. Si a logra of ta logrando, no ta conoci. Tempo lo bisa. 

AUSENTE DEN PARLAMENTO

Mientrastanto, tin tambe e echo cu e parlamentario de Meza, tin basta luna (por lo menos 3) sin drenta Parlamento, debi na su situacion. Despues cu Rene Herde a bira minister, esaki no a cambia y toch de Meza no a aparece den Parlamento. Partido MEP recientemente a hala atencion pa esaki, bisando cu tin un parlamentario cu ta for di parlamento pa basta tempo, sin cu e ta trahando, pero si ta cobrando su salario. Mester bisa mesora cu e no ta e unico y cu den pasado, tabatin partidonan cu tambe tabatin miembronan cu tabata bay vacantie pafo di recess, y tabata cobra normal. Parlamento awor ta cu recess te mitar augustus. Lo wak si de Meza ta asumi su responsabilidad despues di recess, y bolbe asumi su funcion como Parlamentario.