Ambiente di cumbre China-UE ta tur cos menos un celebracion

PEKING - Na Peking awe, presidente Chines Xi Jinping lo duna man na Ursula von der Leyen y António Costa. E presidentenan di e Comision Europeo y e Conseho Europeo a bula pa e cumbre bienal UE-China. E cumbre originalmente mester a celebra 50 aña di lasonan diplomatico entre China y UE, pero e ambiente ta tur cos menos un celebracion.

Tur cos a cuminsa cu e nengamento di Xi pa bin Bruselas pa e cumbre. P’esei, e reunion ta wordo tene na China atrobe, mescos cu dos aña pasa, y den un version mas reduci: e cumbre a wordo haci cortico di dos dia pa un. P’esei e expectativanan ta minimo. Segun un diplomatico di UE, “un bon dialogo” lo ta un resultado positivo caba.