Croes: Di 460 peticion pa Arubalening, 299 a keda aproba, y 186 ta bay Hulanda

ORANJESTAD – Di 460 peticion pa Arubalening cu a drenta e aña aki, 299 a keda aproba y cla y ta haya esaki. Asina Sharine Croes-Dubero a bisa den e noticiero Awe Den Noticia diaranson mainta riba HITS 100FM , encarga cu e parti aki di departamento di enseñansa. Di e 460 peticion pa Arubalening, 86 tabata pa Aruba mes di cual 62 a keda aproba, mientras cu 374 peticion tabata pa ‘internacional’ di cual 237 a keda aproba. Hunto pues, 299 studiante a haya e lening aproba. 

HULANDA

E mayoria semper ta pidi y haya pa Hulanda. Den e caso aki, di e grupo internacional, 186 a keda aproba pa bay Hulanda, mientras cu e cantidad original tabata mas grandi esta 200 y pico segun Croes. Pero por lo menos 60 a cay afo, debi cu sea nan no a slaag finalmente, y of no a haya camber pa bay studia na Hulanda. Di e 186 studiantenan, 86 ta biaha nan mes, of independientemente, y 100 ta biaha riba un buelo ‘organisa’, cu ta wordo yama crioyamente, e buelo di ‘beursalen’. Pero ainda tin cu por cay afo. Mirando cu tin 237 lening aproba internacional, 51 ta pa studia na un pais otro, cu no ta Hulanda. Esnan cu ta keda Aruba, ta bay studia sigur na e.o. Universidad di Aruba.