Arends-Reyes: Kier mira cuenta anual y vision largo plazo di TPEF

ORANJESTAD – Parlamentario Arends-Reyes kier mira cuenta anual y vision largo plazo di e Tourism Product Enhancement Funds ( TPEF). "Nos a solicita pa presenta e cuental anual di TPEF y na minister di turismo pa comparti su vision." AVP a duna un enfoke critico y constructivo di con TPEF ta influencia y desaroya e producto turistico di Aruba. P'esey kier sa tocante e direccion y strategia pa futuro, pidiendo mayor claridad riba Minister Cicilia su vision y metanan pa mehora e turismo riba nos isla cu enfasis tambe ariba pariba di brug. 

CONSTELACION DI HUNTA DI TPEF

Den su pregunta, Arends-Reyes a enfoca riba e constelacion di hunta di directiva y ki paso lo tuma pa sigura e implementacion exitoso di su plan y mantencion di facilidadnan existente."No ta interesa djis den sa con TPEF lo ehecuta proyecto, sino tambe con ta garantisa e mantencion y evaluacion continuo di nan. 

PROYECTO Y META

Ta importante cu nos por evalua si e proyekto a logra su meta, pero si ta mantene di manera sostenibel," Arends-Reyes a indica. AVP ta enfatisa cu e funcion di TPEF no ta limita na proyecto di corto plazo, sino cu tambe ta necesario pa tin un plan na largo plazo pa sigura cu e beneficionan ta perdura. 

MIDI EXITO

Pa e motibo ey, Arends-Reyes a pidi pa haya un plan cu ta inclui metodo pa evalua y midi nan exito. AVP ta keda comprometi na supervisa di cerca e uzo di fondo publico, promove un agenda di claridad, control y bon maneho pa e futuro sostenibel di Aruba.