IPKO ta sigui toch na september cu participacion di Aruba, Corsou y St Maarten

DEN HAAG /ORANJESTAD - Corsou, Aruba y St. Maarten lo participa na e reunion interparlamentario entre e 4 paisnan den Reino, Ipko, cu ta tuma luga fin di september awor na Den Haag. Asina a dicidi den e reunion tripartit cu a tuma luga recientemente na St. Maarten entre e presidentenan di parlamento di Corsou, Aruba i St. Maarten.

Comishon di Relacionnan den Reino di parlamento Hulandes a dicidi cu ta continua cu organisacion di e reunion di Ipko na september awor, despues cu a pospone e reunion cu tabata plania pa tuma luga den luna di juni. A pospone e reunion debi cu den mesun periodo a organisa un encuentro di NATO na Den Haag cu participacion di hefenan di estado di mayoria pais na mundo. Sinembargo, den e proceso aki gobierno hulandes tambe a cay y a yama eleccion nobo cu ta tuma luga na oktober awor.

Ta den e kuadro akí parlamento di Corsou a duna presidente di parlamento, Fergino Brownbill (MFK), e instruccion pa durante e reunion tripartit na St. Maarten sondia kico pensamentonan di St. Maarten y Aruba ta tocante partisipacion na Ipko. Dudanan pa no participa na Ipko ta eleccion na Hulanda. No tin sentido pa participa na e Ipko mirando cu djis despues un parlamento hulandes nobo ta tuma asiento y por dicidi cu no ta adopta cualkier resolucion cu a acepta durante e reunion di fin di sèptèmber.

Presente na e reunion tabata presidente di parlamento di Corsou, Brownbill, presidente di parlamento di Aruba, Marlon Sneek i presidente di parlamento di St. Maarten, Sarah Wescot-Williams. Tur 3 presidente tabata asistí pa nan respectivo griffier di parlamento. Iniciativa pa e  reunion tripartit akí a bini di St. Maarten.

Den e invitashon presidente di parlamento di St. Maarten, Sarah Wescot-Williams, ta bisa cu mirando e elecionnan resien na Corsou, Aruba y St. Maarten y tambe e desaroyonan político na Hulanda, ta oportuno pa  e presidentenan di e parlamentonan di paisnan den Caribe bini hunto y delibera riba topiconan di interes pa e parlamentonan i paisnan. E invitacion pa e reunion tripartit ta sigui riba un invitashon previo di St. Maarten pa presidentenan di di parlamento di Corsou y Aruba ta presente na celebracion di parlamento di St. Maarten na honor di Dia Internashonal di Parlamento.