- Gabinete Pisas a pidi retiro di dos di su ministernan di su gabinete
- Opinion: E post cu tur sa tabata bin: clapchi.
- AZV a lanza logo relaciona cu 25 aña di seguro AZV
- VIDEO: Grupo di prensa local a conoce e restaurant mas nobo ‘Gaia House of Grill’ na JOIA Aruba
- Famia di turista cu a muri tragicamente na Aruba, ta papia, y curpa ta 'pega' na Aruba ainda
James Fazio nombra como CEO Interino di aeropuerto di Aruba
ORANJESTAD - Aruba Airport Authority N.V. (AAA), administrado y operado di Aeropuerto Internacional Reina Beatrix, diaranson a anuncia e nombracion di James Fazio como Hefe Ehecutivo Interino, entrante 1 di augustus 2025. Notable ta si, cu Fazio a bin pa algun dia, pa asesora e situacion problematico di e.o. e liñanan largo pafo, pero no a papia di cu e lo a bira CEO. Aworaki esaki a cambia, y e ta na timon, un biaha mas, aunke pa un periodo interino.
TRANSICION DI LIDERAZGO
“E transicion di liderazgo aki ta bin despues di e conclusion exitoso di e mandato di e Team di Maneho Interino, cu a guia e organisacion durante e ultimo 12 lunanan pa medio di un realineacion strategico, operacionnan continuo y tambe transicion gradual di tur e aerolineanan cu destinacion pa Merca pa e terminal nobo di check-in y tumando den uzo e sistema nobo di maneho di maleta completamente automatisa, aumento di cantidad di pasahero y e retonan operacional”, e comunicado ta sigui bisa.
PAKICO NOMBRA CEO INTERINO
E decision pa nombra un CEO Interino segun AAA, ta garantisa e enfoke continuo riba excelencia operacional, sostenibilidad y prioridadnan stretegico, mientras ta tuma e pasonan final pa formalisa un Strategic Cooperation Agreement (SCA) entre Gobierno di Aruba, AAA y Royal Schiphol Group (RSG). “Den e rol aki, James Fazio lo zorg pa nos capitalisa riba su experticio pa sostene excelencia operacional mientras su liderazgo ta facilita e periodo critico aki y ta pone e base pa e CEO permanente por asumi responsabilidad sin problema bou di e acuerdo binidero.”
JAMES FAZIO
James Fazio ta un ehecutivo di aeropuerto cu experiencia amplio den liderazgo, anteriormente el a fungi como CEO di Aruba Airport Authority N.V. di aña 2013 te cu aña 2019. Su bishita recien na nos isla den luna di juni 2025 a reafirma su familiaridad cu e operacionnan y vision strategico di Aeropuerto di Aruba, esaki ta pone cu e ta bon posiciona pa guia e organisacion durante e fase di transicion aki.
“Nos ta sigur cu James Fazio su conocemento profundo di Aeropuerto di Aruba y su liderazgo demostra lo provee continuidad fuerte segun cu nos ta move den e transicion nobo importante aki”, asina Marion Kan, Presidente Hunta di Directornan di Supervision (BOSD) di AAA a bisa. El a continua bisando cu: “Su regreso ta reenforsa nos compromiso continuo cu stabilidad, siguridad y progreso a largo plaso, mientras nos ta atende cu e retonan ocasional cu por surgi cu e ekiponan nobo y procesonan den un aeropuerto cu capacidad limita.”
E nombracion interino di James Fazio ta parti di e acuerdo cu Royal Schiphol Group, e partner strategico di hopi tempo di AAA, cu ta provee e funcion di CEO bou di e terminonan di e SCA. Su rol lo enfoca riba mantencion di stabilidad den operacionnan diario, sostene cumplimento cu regulacion prome cu e audit di DCCA y garantisa implementacion corecto di iniciativanan clave, manera planificacion y ehecucion di mantencion, manera Fase 1B y e aceleracion di e fasenan 2 y 3 di e proyecto di expansion di terminal di Gateway 2030.
“Hunta di Supervision, accionistanan di AAA y RSG ta gradici e Team di Maneho Interino; Aisha Anthony, Jurgen Benschop y Barbara Brown, pa nan liderazgo, compromiso y dedicacion incansabel durante e aña cu a pasa. A pesar di enfrenta varios reto, nan guia constante a garantisa e continuidad di negoshi, progreso y resiliencia durante un periodo di transicion critico pa AAA” e comunicado ta finalisa bisando.
Aruba Tourism Authority Sui Generis ta celebra 15 aña
ORANJESTAD - Aruba Tourism Authority Sui Generis ta celebra 15 aña. Con ta midi diescinco aña di un entidad nobo cu a nace pa promove desaroyo, innovacion y crecemento di nos economia a traves di nos unico pilar, turismo. Di aña 2011 pa awo, “Tourism Receipts” a aumenta cu 94%, yegada di bishitante a aumenta cu 43%, “RevPAR” a crece cu 82%, mientras cu yegada di turismo crucero a crece cu 36%. E cifranan aki ta subraya e exito y desaroyo sostenibel di e sector turistico di Aruba, desde cu a funda Aruba Tourism Authority Sui Generis.
Aerolíneas Argentinas ta lansa servicio directo nobo entre Argentina y Aruba
ORANJESTAD - Aerolíneas Argentinas ta lansa servicio directo nobo entre Argentina y Aruba. E vuelo inaugural a sali for di Aeropuerto Internacional Ezeiza (EZE) cu tur 170 asiento completamente ocupa, reflehando e demanda fuerte di mercado y un contesta sumamente positivo di parti di e biaheronan Argentino. Pa celebra formalmente e momento, tabatin un ceremonia inaugural cu a tuma luga riba dia 8 di januari, na Aeropuerto di Aruba, treciendo hunto e stakeholdernan clave di gobierno, aviacion y turismo. E celebracion a conclui cu un ceremonia tradicional di cortamento di cinta y cortamento di bolo, oficialmente yamando bonbini na Aerolíneas Argentinas na Aruba.
DIMP: Ultimo dia pa paga impuesto di vehiculo di motor ta 2 di februari 2026
ORANJESTAD – E ultimo dia pa paga impuesto di vehiculo di motor di aña 2026 ta 2 di februari 2026. Normalmente e fecha final ta 31 di januari, pero debi cu e aña aki e fecha aki ta cay riba diasabra, e fecha final ta bira dia 2 di februari 2026. Aki ta sigui mas informacion.
DIMP: Pensionadonan ta paga menos na prima di AZV awor
ORANJESTAD – Departamento di Impuesto a informa tur pensionado y nan doño di trabou, cu entrante 1 di januari 2026 e prima di AZV ta wordo reduci pa e pensionadonan cu tin e edad di 65 aña of mas.Durante aña 2025, e pensionadonan tawata paga 5% riba e prome Afl. 30.000 di entrada of salario (di un empleo den pasado). Si e entrada of salario aki surpasa Afl. 30.000 pa aña, e pensionado ta paga 10,5% na prima di AZV riba e suma restante. Awor entrante 1 di januari 2026, e porcentahe riba e prome Afl. 30.000 di entrada ta 0%. Pues un reduccion di 5%.
Reglanan importante na Aruba pa control riba construccion y demolicion aplicabel awor
ORANJESTAD – For di 1 januari 2026, ta bini na vigor regulacionnan adicional di e Bouw- i sloopverordening di Aruba. E caminda aki ta duna gobierno mas poder pa tuma medida contra construccion i demolicion ilegal, y tambe pa reclama gasto for di e persona cu ta comete infraccion. Esaki ta segun un landsbesluit cu a wordo firma 23 december 2025 y publica den Afkondigingsblad di Aruba. E Bouw- i sloopverordening tabata parcialmente na vigor desde november 2022, pero hopi articulo importante no tabata activa ainda. Cu e landsbesluit nobo, ta wordo pone den vigor esnan cu ta referi na handhaving administrativo, seguridad legal y reclamo di gasto. Ta trata di articulo basico cu ta esencial pa supervision y actuacion efectivo di gobierno.
Den caso di cancelacion di buelo, unda e responsabilidad di aeropuerto ta cuminsa y caba?
ORANJESTAD – Den caso di cancelacion di buelo, unda e responsabilidad di aeropuerto ta cuminsa y caba? Despues di e situacion di fin di siman unda cu buelonan di Merca y Europa a cancela pa Aruba, e pregunta a surgi, ken ta responsabel pa kico. Noticiacla a haci e pregunta ey diamars na e CEO saliente di aeropuerto di Aruba, James Fazio. Wak e entrevista AKI.
Follow NoticiaCla
