Biaha di Aruba pa New York ta mas of mes barata cu biaha di Aruba pa Bonaire

ORANJESTAD –Ta mas barata biaha di Aruba pa New York, cu biaha pa p.e. Bonaire. Por lo menos segun un deal cu e aeroliña JetBlue ta ofrece aworaki. Un portal di turismo, a haya pasashi na balor di apenas entre 258 pa 281 dollar, entre Aruba y New York, rountrip cu JetBlue. Si compara esaki cu un buelo regular    entre Aruba y p.e Bonaire, ta costa $412.31 dollar round trip y mas y e buelo mas barata ta $357. Si compara e distancia, e diferencia ta    ta gigantesco. Entre Aruba y New York tin 3157 km, y e buelo ta dura casi 5 ora, mientras cu entre Aruba y Bonaire tin apenas 187 km, y ta dura 45 minuut. 

SPECIALS

Mester bisa si mesora atrobe cu e tarifa pa Aruba for di New York, ta di un special di JetBlue, y cu otro aeroliñanan manera American ta cobra doble, esta 607 dollar y Delta ta cobra 543 dollar  roundtrip entre Aruba y New York. E dealnan barata ta temporal, y ta depende ki ora y dia bo biaha, y cuanto tempo delanta bo ta biaha. 

BIAHE CORTICO TA KEDA CARO

No obstante tur esaki, ta un echo cu biaha entre e islanan ABC, ta keda ridiculamente caro, siendo cu e ta un distancia masha cortico. Mas leu bo biaha, mas barata e ta bira. Parti di e problema, ta e gastonan di operacion di e ekipo cu cual e aereoliña ta biaha, compara cu e gastonan di un avion cu ta bula distancia mas leu. Tambe ta den wega, e grandura di e avion, e cantidad di pasahero y algun otro aspecto mas. Asina mes, bula mas cerca, ta keda caro. Y ta pesey, Hulanda ta purbando di  wak kico por haci pa biahamento entre e islanan ABC, por bira mucho mas barata.