AAA: Problema cu sistema di maleta no a causa retraso di buelo den weekend

ORANJESTAD – Dos luna despues cu aeropuerto di Aruba a introduci e sistema moderno nobo di maleta den e edificio nobo pa biahero pa Merca, a sosode un situacion cu a causa problema, primordialmente filanan largo (atrobe) pa e pasaheronan afecta. Despues cu varios version di e noticia a aparece riba rednan social, anochi aeropuerto a presenta un aclareacion di e loke a sosode. 

KICO A PASA.

Segun gerencia di aeropuerto, e sistema di maneho di maleta pa buelo pa Merca a experiencia un congestion temporal debi cu algun maleta no a wordo procesa corectamente durante e proceso di check-in. “Esaki a causa un pausa temporario den e proceso di check-in, cu eventualmente a resulta den un fila di pasahero pafo di terminal”, aeropuerto a sigui bisa. “ E situacion a wordo resolvi rapidamente y ningun buelo a experiencia un retraso pa motibo di esaki”, eliminando e rumor cu e situacion a causa retraso cuantioso cu a afecta buelonan cu tabatin coneccon. .

OPTIMALISA E SISTEMA

“Mientras nos ta sigui optimalisa e sistema nobo di maneho di maleta y e operacion den e terminal nobo di check-in, e personal ta sigui haci cierto ahustenan pa mehora e operacion” e comunicado a sigui bisa. Nan ta evaluando e incidente aki pa implementa medidanan preventivo pa evita cu esaki sosode atrobe.

SISTEMA A MEHORA

Mes momento a usa e momento aki pa duna un ‘update’ riba e situacion di e sistema nobo. Manera cu Noticiacla a bisa recientemente, aeropuerto no tabata ‘cla’ pa duna un update ainda y lo a haci esaki ‘fin di luna’. Pero no a pensa cu esaki lo a bira den e forma asina, despues di un incidente asina. 

“ Nos ta contento pa bisa cu danki na e terminal nobo pa e buelonan Mericano, e sistemanan nobo y e control di fluho di pasahero recientemente introduci, e operacion a mehora bastante - cu un proceso mas eficiente y sin necesidad di recoge maleta of control di seguridad secundario” e gerencia a bisa, riba e sistema nobo cu ta funcionando for di algun luna awor.