Botica di Servicio ta Conoce Su Prome “Streya di Botica”

ORANJESTAD - Botica di Servicio ta orguyoso di por anuncia su prome Streya di Botica, Lilienne Figaroa. 

Streya di Botica ta un iniciativo cu a wordo crea pa asina resalta personal di e team cu ta “go above and beyond” den nan trabou. Inspira pa e concepto di “Employee of the Month”; e premio aki ta representa y refleha e balornan fundamental di Botica di Servicio y su team. Coleganan ta wordo curasha pa nomina un colega cu ta duna ehempel di e balornan fundamental di Botica di Servicio atraves di un proceso simpel di nominacion. 

No solamente enfocando riba e desempeño, Streya di Botica ta reconoce individuonan cu constantemente ta demostra un actitud, compromiso y teamwork sobresaliente. Esaki ta inclui comunicacion proactivo, interacion respetuoso cu coleganan y pashent, e habilidad di por conta cune y e voluntad di haci un impacto positivo den maneranan grandi y chikito.    

Botica di Servicio ta reconoce Lilienne Figaroa como su prome “Streya”. Lilienne su dedicacion excepcional, profesionalismo y spirito positivo ta di remarca. E ta un ehempel claro di e pakico e premio y reconocimento aki ta existi.

Botica di Servicio ta kere den reconoce e curason di e organisacion–nos coleganan. Streya di Botica ta un manera di celebra esnan cu ta haci un diferencia cada dia.

Masha pabien Lilienne y danki na nos team pa e tremendo trabou cu ta wordo haci pa por brinda e miho servicio riba e isla di Aruba.