Corte: Ex chauffeur di ex prome minister acusa di abuso sexual, ta keda deteni!

ORANJESTAD – Corte a rechasa e peticion di abogado di e ex chauffeur di ex prome minister Wever-Croes, esta S. Koolman, pa suspende su detencion preliminar relaciona cu acusacion di abuso sexual di menornan di edad. Esaki kier men cu Koolman mester keda encarcela na KIA te ora cu su caso bin dilanti. Loke si a dun’e ta pa scucha 4 testigo, di cual uno ta un di e victimanan. E peticion tabata pa suspende e detencion, te ora cu e caso keda trata integralmente, posiblemente pa luna di september di e aña aki. 

E ACUSACION

E acusacionan contra Koolman ta e.o. abuso sexual di menor entre 4 di April 2015 pa 13 di mei 2023, un otro caso di abuso sexual di menor entre 25 di augustus 2019 te 13  di mei 2023. Posesicion di pornografia infantil y tambe posesion di 6 arma. 

DETENCION

E ta encarcela for di dia cu e la keda deteni, dia 4 di maart ultimo, y esaki relaciona cu un investigacion cu tin andando di delitonan sexual. Durante e registro den cas di K. na Papilon a confisca cargadornan di informacion, como tambe seis arma di candela y un cantidad considerable di municion. E tratamento di e caso mes, ta poni pa tuma lugar na september proximo. 

PROLONGA DETENCION

E siguiente diabierna merdia, un huez comisario a dicidi pa no solamente prolonga e detencion di e chauffeur di e tempo ey ainda, prome minister demisionario Evelyn Wever Croes, esta S.K, sino a mande mesora pa KIA tambe. Normalmente ora cu un persona keda deteni, inicialmente e ta keda 2 pa 8 dia den un cel di polis, y ta ora cu prolonga e detencion dos biaha mas, ta manda e persona KIA. Tin excepcion claro, y e biaha aki tabata e biaha ey. 

MAS PROLONGACION

Riba 21 di maart, Huez a dicidi, riba peticion di Fiscal di Husticia, pa duna ordo pa detencion (gevangenhouding) di e sospechoso Siki  K. pa un termino di 90 dia, den cuadro di un investigacion di delitonan sexual. Vocero di Ministerio Publico Ann Angela confirma esaki pa noticiacla.  Prome cu e periodo aki termina, e sospechoso mester a wordo presenta (pro-forma) dilanti Corte den Prome Instancia. E investigacion ta continua.

E PERSONA

Koolman ta ambtenaar di funcion y durante periodo di gabinete Wever-Croes 1 y 2, ta fungi como chauffeur pa prome minister di Aruba Evelyn Wever-Croes.  Noticiacla a compronde cu e ta un miembro di club di tiramento, y cu e armanan lo ta pertenece na e club aki.