Analisis: Tempo ta cabando pa Eman y de Meza

Scirbi pa Tito Laclé

E tema di screening, cu mientrastanto a haya e apodo di ‘novela’, y cu tin tur e ‘trimmings’ pa bira e siguiente best seller riba Netflix, ta yegando su punto culminante. Mientras cu bo por kere y cu ta parce cu gobernantenan, mas specifico, e prome minister Mike Eman tin tur eternidad pa rek e asunto aki estilo kakiña, nos a compronde cu su tempo ta cabando…. De echo, sr Eman tin cu cera e capitulo, mas pronto cu ta posibel. Y e ‘pronto’ -, si e kier tene su mes na e intencion di e ley ,- mester ta ‘e siman aki’, si nos a comprende bon. Di otro banda, e mesun ley di screening aki, sinembargo no tin NINGUN sanccion pa e formador/MP si e no cumpli cu e ley.  Pues, teoreticamente ta Parlamento lo mester roep e op ‘ter verantwoording’. Ban wak si Parlamento ta suficientemente ‘independiente’ pa haci esaki. Ta bira tempo pa interes general di Aruba haya mas prioridad cu interes personal di sr de Meza of interes di partido AVP di sr Eman.

SCONDE

Te cu awo Mike Eman por a ‘sconde’ tras di e ponencia cu  “Mike de Meza su documentonan di screening no ta cla of completo”. Pero, awor e no por haci esey mas. Un ponencia asina no ta creibel mas, y esey hasta un ciego por wak. Huez mes a bisa recientemente den su sentencia di e caso cu de Meza a inicia contra DIMP, cu tur documento di screening tey den dossier di de Meza. Tur informacion cu ley ta rekeri, a wordo pidi y ricibi, y ta keda na Mike Eman so pa tuma e decision. Of manera e dicho na Hulandes ta bisa, ‘hij moet de knoop doorhakken’. Y e ‘descubrimento’ recien cu Mike de Meza ta un sosopechoso, no ta cambia esaki. Al contrario, awor tin un otro documento mas den e dossier di screening cu ta mustra segun ley cu de Meza no ta ministeriabel. E loke por parce un smoke-screen , esta e caso di sr de Meza e siman aki contra Ministerio Publico lo no kit’e di ta un sospechoso, sino lo sirbi solamente pa bis’e di kico e ta sospechoso. E caso ey ta tuma lugar diahuebs mainta tras di porta cera. 

NOTIFICACION

Segun e ley di screening, Mike Eman mester (a) inicia e proximo paso, cu ta pa notifica de Meza cu a base di e resultadonan di screening e no ta ministeriabel. Aunke nos sa cu Eman lo a prefera di tin e bendicion di amigo de Meza prome cu e haci tal. Pero amistad no por carga prioridad riba cumplimento cu rekisitonan di ley. En todo caso, no ora ta trata di e bien comun cu Eman mes ta pretende di kier sirbi. Di otro banda, e declaracionnan recien di sr de Meza ta indica cu sr Eman no tin su bendicion ‘ainda’ pa sigui e proceso segun ley. E siguiente paso pa Eman, despues di notifica de Meza, lo mester ta pa propone un otro persona, envez di de Meza. De Meza lo mester busca un persona di confiansa, cu por funciona manera su satelite den e posicion di minister. Pero asina leu Eman y de Meza no ta ainda, manera cos ta parce. Ley no ta laga ningun duda: Eman no por presenta un candidato cu ta un sospechoso den un caso andando pa wordo apunta como minister. Algo pa cual -, segun e mesun ley ,- e mester notifica de Meza di dje, mas pronto cu ta posibel. Y, e pronto ey, mester ta e siman aki ainda, si e kier keda den e cuadro di e intencion di e ley. Tempo, of mas bien, e dianan nos dilanti, lo bisa si Eman ta scohe pa amistad y interes partidario of pa djis cumpli cu ley y e bien comun pa nos isla. Sin prentende di tin un bola di cristal, lo no sorprende ningun hende si Eman scoge pa ‘keda sin actua’ e siman aki.