Seleccion di Corsou ta aplasta seleccion di Haiti cu victoria grandi

ORANJESTAD - Den nan último wega bálido pa e di dos buèlta di klasifikashon pa Mundial ayera, Kòrsou a gana di Haiti ku skor di 5-1.

Selekshon di Kòrsou a pika dilanti den e partido aki ku un tremendo gol pafó di área penal di Gervane Kastaneer na di 12 minüt. Tur esaki no opstante ku Haiti tabata a krea mas peliger den e kuminsamentu di wega.

Djis un ratu despues na di 15 minüt Kenji Gorré ta manda Kòrsou ariba 2-0, despues ku Jearl Margaritha ta dun’e un pase ku gol bashí.

Despues di esaki Haiti a kuminsá kontrolá e wega, i a krea vários opshon di gol.

E selekshon haitiano tabata kontrolá e wega, i praktikamente selekshon di Kòrsou mester a defendé te ku final di e promé tempu.

Den di dos tempu Haiti a sigui pone preshon riba e gol di Kòrsou. Na di 61 minüt ku gol di Louicius Deedson, e selekshon di Haiti a kòrta den e bentaha di Kòrsou.

Despues di esaki selekshon di Kòrsou a lanta bèk, i a bolbe drenta e wega. Esaki dor di hasi uzo di salida rápido i velosidat di atakantenan.

Un di e hungadónan ku a yuda den esaki tabata Jürgen Locadia. El a drenta wega remplasando Kastaneer na inisio di e di dos tempu.

Na di 70 minüt Jearl Margaritha ku un bunita tiru, riba pase di Locadia, ta hasi e wega 3-1 pa Kòrsou.

Kòrsou a sigui pone preshon, i na di 89 minüt, sinku minüt despues di a subi, Kevin Felida ta anotá pa hasi e wega 4-1. Esaki tabata Felida su promé gol ku selekshon di Kòrsou.

 Miéntras Jeremy Antonisse a pone e chèri riba e bola, ku un gol na di 90+3 minüt.

Kòrsou ku e viktoria ta gana nan grupo, i ta avansá pa e último fase di klasifikashon pa Mundial invikto. Nan a kibra tambe ku Haiti su racha di nuebe sigui sin pèrdè.

Despues di e resultadonan di ayera Kòrsou lo bai ta, den pòt 3 djaweps durante e sorteo pa e fase final di klasifikashon pa Mundial. NOTA: E texto ta scirbi den Papiamento fonetico di Corsou.