Arhnem: Ta compronde indignacion riba e supuesto uso di marijuana door di cantante Beéle

ORANJESTAD- “Mi ta compronde e indignacion” tabata e palabranan di alto comisario Ramon Arhem diamars mainta den un declaracion pa Noticiacla riba e tema di e supuesto ‘joint’ (marijuana) cu e artista Beéle lo a huma riba stage durante e Flip Flop Festival. Aunke cu polis a clarifica e asunto caba dialuna, e alto comisario a haya ta bon pa trece mas clarificacion diamars riba e tema. Esaki pasobra a keda pregunta y hopi hende rabia, indigna riba e loke cu nan a mira, of den e caso aki, a kere cu nan a mira. 

" Ora mi wak e potretnan, pa mi tambe ta parce cu loke e (Beéle) tin den su man, ta un joint. Y esey mi ta desaproba fuertemente. Pasobra e ta illegal y prohibi ” Arnhem a sigui bisa. Loke a pasa, segun e comisario, ta ora cu a mira e acto diasabra, a atende e artista mesora riba e asunto door di polis. “E ora e la deshaci di e sigaria”. Despues a papia cu e organisadornan cu a bisa cu e no ta un joint, sino shaq. Esta e sigarianan cu bo ta lora y converti den un sigaria. Y segun e organisadornan, e acto ta parti di e show, y cu mester mira e otro shownan unda cu den tur, e ta huma e shaq. Esaki a pone cu e organisadornan mes lo saca un comunicado unda cu nan ta sigura cu ta shaq y cu e ta algo cu e artista ta haci den tur presentacion. Y segun Arnhem, pesey polis tambe a emiti un declaracion dialuna, pa bisa cu e loke cu a mira, no tabata un joint di marijuana.  A compronde cu despues a bin mas potret cu ta mustra cu lo a wordo traha cu AI, cu ta parce berdad riba un joint. “Y esey ta crea indignacion y esey mi ta compronde hopi bon!”.  Arnhem a bisa cu e organisacion awor, riba orden di polis, ta bay saca un comunicado mas cla, cu ta splica e situacion. 

MAL EHEMPEL

“Loke cu mi ta haya, ta cu e ta un mal ehempel pa hubentud” Arnhem a sigui bisa. Loke e tambe ta lamenta, ta cu e ta desvia atencion di e festival, pasobra tabatin 12 mil hende, y e evento a cana sublime, practicamente sin incidente. “Y e tabata un bunita fiesta. Ta lamenta cu e percepcion di uso di marijuana, a crea tanto comosion. Y ainda no ta cla si enberdad no ta marijuana”. E ta bay riba principio di ekivalencia, unda cu si bo actua cerca un, bo tin cu actua contra e otro tambe. “Nos ta admiti tambe cu algun cos no a bay bon, rond di e comunicacion. Y eynan nos mester ta honesto, y siña di dje. Pero e mas importante ta cu nos ta admiti cu algun cos a bay robez.