KPA: Beéle no a usa substancia illegal riba tarima durante Flip Flop Festival

ORANJESTAD – E artista colombiano Beéle cu diasabra anochi tabata den concierte durante e Flip Flop Festival, no a usa substancia illegal. Por lo menos, asina un comunicado di cuerpo policial dialuna a sigura.  Segun Cuerpo Policial Aruba, nan a tuma nota di diferente post cu ta circulando riba rednan social pa loke ta trata e evento di Flip Flop cu a tuma lugar den Harbour Arena diasabra dia 7 juni.

ARTISTA BELEE

Ta trata di un potret na unda e artista Beéle lo ta tin un sigaria parecido na un substancia illegal (marijuana?) den su man durante cu e ta dunado su show.  

INVESTIGACION

Di parti di Cuerpo Policial di biaha a haci un investigacion pa loke ta e hecho aki.Awe durante oranan di merdia hefe di Districto di Oranjestad compaña pa su personal como tambe hefe di departamento di comunicacion di KPA a sinta na mesa cu promotor di dicho evento. 

PRODUCTO DI TABACO CU NO TA ILLEGAL

“Nos kier aclaria cu niun rato no tabata papia di un subtancia illegal. Ta trata di producto di tabaco” e comunicado di polis a sigura. E promotor a splica cu esaki ta parti di e artista su show. Nan como promotor sa di ley y reglanan cu tin y no lo a permiti esaki. A mustra esnan na mesa un comunicado tambe oficial di e manager di e artista na unda e ta pidi su disculpa y enfatisa cu nan ta reconoce cu como organisador di e evento nan tin un responsabilidad pa cu e publico y specialmente na e generacion nobo (hoben) cu ta sigi e artista encuestion.

PREPARACION PROME CU CONCIERTO

Di parti di Cuerpo Policial nos ta informa cu a sinta na mesa simannan prome cu e organisador y despues tambe tabata tin un di dos reunion cu e stakeholdersnan pa loke tabata e evento aki mirando e magnitud  di hende cu e lo a trece e anochi di e concierto. 

SUFICIENTE POLIS

Cuerpo Policial a percura pa tin suficiente polis uniforma durante e evento como tambe e parti di Mobile Commando. 

Organisador a percura pa camaranan den diferente parti di e venue y na unda polis tabata tin acceso pa cu esaki. Di parti di e organisador tambe a pone suficiente security na diferente parti di e venue. E anochi a bay sin incidente pa loke ta trata e parti di orden publico y seguridad di cada un cu a bin presencia e concierto.

Cuerpo Policial Aruba ta enfatisa y recorda cu humamento di marihuana ta ilegal na Aruba. Articulo 4 di Landsverordening Verdovende Middelen.