Consulta trilateral tocante seguridad Region Caribe

WILLEMSTAD - E siman aki a tuma lugá na Kòrsou un konsulta semestral trilateral entre sosionan  envolví di Defensa di Reino Hulandes, Estádos Unídos i Fransia.  E konsulta periódiko ta forma parti di e “Joint Interagency Task Force South” (JIATF-S), un relashon kolaborativo internashonal i interdepartamental bou di guia Merikano, ku ta enfoká su mes riba kombatí trafikashon i kontrabanda ilegal den Region Karibe. CZMCARIB na nòmber di Reino Hulandes, ya pa mas ku 30 aña ta forma parti  di e organisashon JIATF(S).

Durante e konsulta e delegashonnan a dialogá tokante asuntunan aktual, inteligensia, operashonnan, konseptonan nobo i kordinashon di esakinan, ku mester guia na un mihó  ehekushon  di e operashonnan konhunto kontra narkótika.  E forma marítimo di operashonnan kontra narkótika ta eksitoso i ta yuda ku e kombatimentu di kriminalidat transfronteriso den region. Tambe resientemente  e paisnan a kolaborá eksitosamente riba e tereno aki.  Asina simannan ku ta tras di lomba a ehekutá un operashon kontra narkótika entre Hulanda i Fransia,  i na e momentunan aki intensivamente ta trahando huntu ku Estádos Unídos. E barku di stashon Zr. Ms. Friesland ta ekipá pa esaki ku un ekipo di embarkashon Merikano di Wardakosta Merikano, i ta kolaborá ku un helikòpter di Wardakosta Merikano ademas di barkunan di Wardakosta Merikano. Ku e kolaborashon i e konsulta aki, sosionan responsabel  pa defensa di Reino Hulandes, Estádos Unídos i Fransia, a suprayá  nan antoho konhunto pa un Region Karibe sigur i stabil. NOTA: Text ta scirbi den papiamento fonetico di Corsou.