Director local di interpol Dolfi Richardson a gana su caso contra gobierno y por sigui cu su trabou

ORANJESTAD – Minister a actua contra ley y como tal, corte ta destrui e decision pa revoca e carta di ‘verklaring van geen bezwaar’ contra Dolfi Richardson.  Asina corte a dicta diaranson den un sentencia cu Richardson a cuminsa contra gobierno di Aruba. Abogado David Kock a defende Richardson, mientras cu abogado Caster a defende gobierno (lesa: minister). E sentencia aki ta kita obhecion pa Richardson continua como director di e.o. Interpol na Aruba y NCTVI, esta Nationaal Centraal Bureau Terrorismebestrijding, Veiligheid en Interpol. 

E CASO 

E caso ta cu minister a revoca e asina yama ‘verklaring van geen bezwaar’ di Richardson na mei di 2024, cu ta haci imposibel pa Richardson keda como hefe. E motibonan duna, tabata hopi y tabata varia di e.o. comportacion incorecto (acoso sexual) pa cu personal femenino na trabou, no a actua cu profesionalismo pa loke ta e personal femenino, tabata gaña structuralmente y mas. Na tur ta trata di por lo menos 5 motibo. Tur esaki ta pone segun e minister, cu Richardson no ta apto pa e funcion asina importante. Richardson a protesta contra e decision aki, riba cual un comision di supervision di departamento di Seguridad Nacional (VDA) a rechasa e protesta aki. Atrobe Richardson a bringa e decision, argumentando entre otro cu e minister a actua contra ley, door di haci un evaluacion den un periodo mas cortico cu ta stipula pa ley. Pa ley, cada 5 aña mester revisa e persona en cuestion y dicidi si e por renoba e verklaring van geen bezwaar pa e persona. Pero e minister a haci esaki den un tempo mas cortico. Ley enberdad ta permiti e minister pa cambia e periodo, pero solamente si tin motibonan special. Y aki esey no tabata e caso. E minister su hustificacion ta cu e por a hacie, basa riba un maneho interno di e departamento y cu ley ta permiti esey. Aki ta unda cu Corte a diferencia di opinion cu e mandatario. Como tal e minister a viola e ley pa cual e huez a dicidi pa destrui e decision di minister y revoca esaki. Esey kier men cu Richardson ta haya e carta necesario y por sigui como director di e departamento menciona. Por lesa e sentencia AKI.