Cu caida di gobierno hulandes, Zsolt Szabó (Asunto di Reino) tambe ta bay mesora

DEN HAAG – Cu caida di gobierno y retiro di tur gobernante di partido PVV, ta bin un fin tambe na e termino di actual secretario di estado pa Asuntonan di Reino ( y Digitalisacion), drs Zsolt Szabó. Esey kier men cu Aruba ta haye cu otro persona awor pa atende cu asuntonan entre Hulanda y Aruba (y otro islanan di Caribe Hulandes). Mientras cu oficialmente e no ta confirma, noticiacla a compronde cu e actual minister pa NSC Judith Uitermark cu ta minister di BZK, (Asuntonan di Reino) lo tuma e trabou di Szabó over tambe. 

SZABÓ

Szabó den un tempo corto (desde juli 2024) a laga mira un maneho firme y no tur ora aprecia, unda cu e tabata para firme y no tabata kier a dobla riba presion di gobernantenan di Caribe Hulandes. E la nenga di cambia e deadline di mei ultimo pa entrega di e concepto di ley di supervision financiero, cu consecuencia cu Aruba ta haye ta paga mas na interes entrante October proximo. Ademas, e la baha e placa di fiansa inicialmente acorda di 130 miyon te 80 miyon pa islanan BES. Y asina tin mas punto cu Szabó a atende. Noticiacla a compronde cu den curso di dia awe, BZK lo saca un comunicado cu e situacion nobo awor cu premier Schoof a entrega retiro di su gabinete na Rey Willem-Alexander.