Evento semanal “Ban den Caya” mester ‘reinventa Caya Grandi como hotspot

ORANJESTAD - Diaranson mainta, Prome Minister mr. Mike Eman, hunto cu Minister di Finansa y Economia mr. Geoffrey Wever y Minister di Turismo mr. Wendrick Cicilia, a anuncia e proyecto piloto “Ban den Caya”, un evento cultural semanal cu e meta pa reinventa Caya Grandi como un hotspot vibrante di cultura, creatividad y orguyo Arubano. E prome edicion lo tuma luga dia 6 di juni 2025, di 7’or di atardi pa 10’or di anochi, y lo sigui tur diabierna anochi te 29 di augustus 2025, cubriendo un total di 13 edicion.

Segun Prome Minister Eman, e obhetivo principal di “Ban den Caya” ta pa duna Caya Betico Croes un imagen nobo como curason cultural di Oranjestad, na unda cu lo tin un cantidad di kiosko, productonan artesanal, baile y un sin fin di actividad tipico cu lo yuda identifica Aruba su herencia cultural. Esaki cu e meta pa trece movecion bek den Caya Grandi y hunto cu e comerciantenan den e area y restaurantnan, duna e publico un experencia autentico combina cu un shopping night.   

“Ban den Caya” ta un invitacion pa conecta cu nos herencia, celebra nos talento y stimula un desaroyo sostenibel pa futuro. 

Cada edicion lo inclui:

Presentacion di musica en bibo, danza folklorico, 

Performance art;

Mercado di arte y artesania manera productonan traha na man, arte visual, souvenirs y hopi cuminda u cos dushi local;

Zona culinario cu ta ofrece cuminda local, food trucks, street food;

Skina pa mucha cu wega.

SITIONAN

E sitionan di entretenimento ta inclui Plaza Daniel Leo, Plaza La Linda: Food court / Stage principal y Plaza Nikki Habibe dilanti Djiespie’s Place y Chubato Beer World.