Otro siman diaranson huez ta duna veredicto den caso di de Meza contra DIMP

ORANJESTAD – Diaranson otro siman (4 di juni 2025) Corte ta dicidi si ta bay di acuerdo cu e demanda di candidato pa minister Mike de Meza den e caso cu e la entama contra Inspector di Impuesto (DIMP). Awe mainta, e caso hopi anticipa a inicia, unda cu partidonan envolvi a presenta nan caso na e huez, mientras cu pafo, un grupo basta grandi di simpatisantenan di de Meza tabata wardando, mayoria di nan, bisti na preto. Y e prome pregunta haci pa e huez, ta determina e esencia di e caso: Kico tin den wega pa de Meza, y si e mester haya un carta cu e comportacion fiscal. 

DE MEZA 

Despues di a haci e pregunta inicial, huez a pidi de Meza pa splica su situacion. Aki de Meza a cuminsa na splica cu basicamente, e kier pa e caso aki limpia su nomber y imagen. “Mi nomber a wordo mancha tur caminda, den media, riba rednan social y pa contrincantenan politico” de Meza a cuminsa na bisa. E la pidi un declaracion di su comportacion fiscal, ya cu prome minister, e tempo ey formador, a pidie, pa sa si e por hacie minister  di e proximo gabinete. Pero DIMP no kier dune esaki. 

DUINEVELD Y CROES

Asistente di abogado Desiree Croes, mr Edwin Duineveld a cuminsa riba e punto di e asina yama ‘voorlopige voorziening’, esta pa huez haci un declaracion temporal cu su cliente por usa mesora ora cu dicta e sentencia, y a argumenta pakico mester por declara esaki possible. 

CROES

E abogado mes a pinta un cuadro di su cliente, resumiendo na final cu a pidi un carta di comportacion fiscal. E informacion aki a lek, y consecuentemente esaki a resulta den atake contra su cliente, cuestionando su integridad como ciudadano cu ta cumpli of no cu impuesto. Loke e abogado ta cuestiona, ta cu mirando cu DIMP mes ta sigura cu e cliente no tin ningun debe habri, no tin ningun areglo di pago aworaki, pakico e no por haya un declaracion cu ta bisa esaki. Segun Croes, DIMP no ta duna un motibo pa esaki. A haci e pregunta varios biaha, y cada bez a haya un contesta negativo, esta pakico no por haya e carta. Si DIMP ta basa su mes solamente riba e hecho cu e persona semper mester entrega su declaracionan fiscal na tempo y corecto, cu nunca un hende lo haya dicho declaracion e ora. E abogado a admiti cu De Meza no semper a entrega su declaracionan na tempo. Pero awor e la regla tur su cuentanan y consecuentemente DIMP mester dune un declaracion awor, uno nobo. Croes a tuma DIMP na malo cu a usa un caso como ehempel, di Corsou, pa splica su caso, unda cu e persona na tal occasion tampoco a haya su carta di comportacion fiscal. Pero esey ta un caso full diferente y no por compara esaki cu su cliente. A constata cu DIMP no ta obhetivo cu su hecho, y tabata hopi negativo  riba su cliente, indicando entre otro cu su cliente lo no ta integro.  “ De Meza no ta wordo husga sino condena pa e inspector” e abogado a finalisa bisando. 

HUEZ

Na final e huez a haci un serie di pregunta, y a puntra e abogado, kico e kier pa e huez haci. E abogado a sugeri cu e kier pa DIMP, cu e informacion ‘nobo’ di de Meza, saca un declaracion di comportacion fiscal, cu riba su mes, mester mustra cu de Meza a cumpli cu tur su responsabilidadnan fiscal, habriendo asina caminda pa e bira minister, y  ademas ta limpia e nomber di su cliente. Huez a cera tratamento di e caso y ta dicta sentencia otro siman diaranson 4 di juni, unda cu e lo manda e informacion pa ambos partido.