Canwood: OM no a proba culpabilidad di Besaril, pa cual ta pidi absolucion di cliente

ORANJESTAD – Ex minister Guilfred Besaril diabierna mainta a refuta e contenido di e rekisitorio di Ministerio Publico contra dje. “E la scucha e punto di bista di OM cu hopi atencion, y lo no sorprendebo cu Besaril no ta comparti e punto di bista di OM” e abogado Doris Canwood a cuminsa bisa den su defensa di e cliente Besaril den e caso penal Tulipan. Ademas, e abogado a sigui bisa, Besaril ta di opinion cu no a proba di ningun forma, cu e la haci su mes culpable na e 6 acusacionan contra dje. Y como tal mester absolve di tur esaki. 

E CARGONAN

E abogado a resumi e cargonan cu tin contra su cliente, unda cu mayoria ta trata di malversacion, di door di paga sumanan na SETAR, paga e compania di pr Elever, estadia na Aruab, y e uso di e tarjeta di bancomatico di Arubahuis. 

NO ADMISIBLE 

Ademas e abogado a usa e carta di declara OM no admissible, pasobra ta considera cu a malusa poder, unda cu a usa e ley penal envez di ley administrativo. De echo, tabata e pregunta si a viola e ley di comptabilidad of no. Y si esey tabata e caso, den caso di un conflikto cu e regulacion di compatibilidad, Besaril lo ta civilmente responsabel den e contexto di un peso rasonabel y husto di interesnan, preferencia lo wordo duna y mester tin diferencia hopi cla pa loke ta e posicion di minister plenipotenciario na Hulanda y esun na Washington. Ademas, segun e abogado, ta cuestiona e forma sugestivo cu cual e interogacionan a tuma lugar di su cliente, unda cu ta haci pregunta como si fuera e ta culpable caba, y cu no a tene cuenta cu su puntonan. 

DESBARATA TUR PUNTO

A sigui un defensa largo di casi un ora y mei, unda cu e abogado a purba desbarata tur e puntonan cu a wordo treci dilanti. E base di e defensa grandemente a keda na e hecho cu pa hopi di e actonan di cual ta culpa e cliente Besaril, no tabatin maneho stipula. Esaki a bin keda estableci apenas na 2022 ora cu Besaril a bay caba. Esey ta conta e.o. pa e uso di medionan pa comunicacion manera e telefon di Setar. E abogado ta sigura cu e cliente a maneha confore e ley Voorziening Politieke Ambsdragers. Gastonan pa e.o. limpiesa di cas, no ta malversacion di fondo, ya cu ta custumber pa Arubahuis, pa presta servicio di limpiesa pa e minister. E diferencia ta cu e tabata tuma lugar na e otro cas, y no e cas official. Y tur esaki tabata cu permiso di e prome minister. Si tin cosnan cu no a cana corecto, no por culpa Besaril, pasobra e no tabata mete mucho cu e cosnan ey. “Besaril tabata sali di e punto di bista cu e cosnan tabata cana corecto. De echo, ora cu e la bandona e cas, Arubahuis a deshaci di e Sistema. Pues no por papia di ‘malversacion’ aki. Pa loke ta e compra di muebles, tampoco por papia di malversacion pasobra ora cu e la bay, e la laga e muebles pa Arubahuis, ya cu ‘ta Arubahuis a cumpra esaki’.

E remodelacion di e cas, tambe a sosode corecto segun Besaril. A mustra cu e no por a cambia di cas, conforme e contract y como tal a haye obliga di haci cambio na e cas. Y a usa e servicio cu Arubahuis mes ta usa tambe. De echo, tabata e departamento di finanzas mes a sugeri pa usa e servicio aki.”Cerca Landsrecherche ta parce cu tur hende diripiente a sufri di perdida di memoria”. 

Pa loke ta e servicio di e compania di publicidad local E., Besaril, segun su abogado, a purba hustifica cu e tabata necesario pa haya asistencia na inicio di su carera como minister. Entre e trabounan, tabata e bishita na Roma, unda cu e la topa cu e Papa Francisco y ofrece un regalo. Tur esaki a keda regla pa e persona J.H di e compania E. Y berdad cu a usa E, pero tambe e persona Kock na Hulanda, pero e diferencia di ora tabata haci e trabou dificil ora cu e tabata haci cos na Aruba. A admiti cu e declaracion y splicacion di servicio di e compania, por tabata miho si. Pero despues di a usa e servicio pa 7 aña, ta dificil pa corda e detayenan. A sigura cu ningun momento H. a asisti Besaril cu su campaña na Aruba, pasobra e persona tabatin otro cliente caba pa campaña. Pues no por bisa cu e la malusa e persona y pone Aruba paga pa algo personal, pa cual e mester keda absolve di e cargo aki tambe. 

MALUSO DI PODER

Pa loke ta e parti di maluso di poder, tambe Besaril su abogado a desmenti mal practica. “No mester perde di bista cu e trahadonan di Arubahuis a wordo interoga pa CAD cu tabata busca ‘sanger’, y e forma con Landsrecherche y DRH (Direccion di Recurso Humano) a interoga nan, dificilmente por a haci otro cu tira nan minister bou di bus, pa scapa nan mes. Ningun hende cu wak con Besaril ta wordo trata actualmente, lo bisa otro cu loke ta spera di dje. Nan mester al fin y al cabo, mester sigui cu e organisacion aki, cu ta den necesidad urgente di un reorganisacion, segun rapport di DRH”. 

CONCLUSION

Segun e abogado, Besaril ta di opinion cu e echonan pa cual ta acus’e di dje, no ta constitui ofensanan penal. E la sigui pa splica tur e asuntonan di malversacion, y ta haya cu su cliente mester haya absolucion di tur e dossiernan riba malversacion. 

CASTIGO

Pa loke ta e castigo exigi, a pidi huez cu si e tin otro opinion, pa no dune un castigo di prizon mas largo cu su detencion preventivo. Besaril a perde su trabou, y dificilmente por haya otro trabou otro caminda. E la wordo retira di KPA y mester cuminsa di 0. E ta un asina yama ‘first offender’, y  lo tin dificultad pa haya trabou. Su bida ta kibra, y den un comunidad chikito, e bida pa Besaril ta bira dificil. E abogado a pidi pa tene cuenta cu tur esaki, ora di considera e sentencia. E huez ta dicta sentencia dia 13 di juni proximo.