Merca oficialmente a acepta donacion di avion Boeing di Qatar

WASHINGTON - Merca oficialmente a acepta un Boeing 747 di e famia real Qatari como regalo. Un vocero di Pentagono, cu formalmente lo ricibi e avion, a bisa medionan Mericano. Door di duna e avion na Pentagono, Presidente Trump no mester pasa pa Congreso pa haya aprobacion pa acepta e regalo.

PREOCUPACIONNAN TOCANTE REGALO

E plan ta pa e avion wordo converti y sirbi temporalmente como e avion presidencial Air Force One. Tabatin hopi boroto tocante e Boeing di antemano. E ta un di e regalonan mas caro cu un gobierno Mericano a yega di acepta: un Boeing 747-8 tin un balor nobo di alrededor di 400 miyon dollar. Democratanan den Congreso, como tambe algun di e aliadonan di Partido Republicano di Trump, a expresa nan preocupacion riba e donacion den e ultimo simannan. Nan a yama acepta e avion no-etico y inconstitucional. Nan tin miedo tambe di influencia di Qatar. Qatar a desmentí e acusacionnan ey y Trump mes a yam’é “bobo” si e avion no a wordo acepta. “Dicon nos militarnan, y pues nos pagadonan di belasting, mester paga cientos di miyones di dollar pa algo cu nos por haña gratis?” el a scirbi riba su mes plataforma Truth Social.