Croes: Murray a presenta su mes como abogado di DIMP, contra De Meza

ORANJESTAD – Despues di e bay bin diamars anochi riba e noticia di abogado pa departamento di impuesto (DIMP) contra parlamentario Mike de Meza, unda cu tabatin discusion si enberdad e abogado di Corsou mr Mirto Murray a bira abogado pa departamento di impuesto den e caso contra parlamentario de Meza otro siman, (gobierno a desmenti),  e abogado di de Meza, mr Desiree Croes a confirma pa Noticiacla diamars anochi laat, cu enberdad mr Mirto Murray, ta abogado di Inspecteur der Belastingen. “Si, 100%. Awe tardi e la stel su mes como gemachtigde di inspecteur!” mr Croes a sigura noticiacla. Ademas, Croes a splica e terminologia legal, unda cu ‘stel su mes’, ta ora cu un abogado informa cu e lo ta hiba e defensa pa un cliente. “E la informa Corte awe cu e lo ta e abogado di Inspecteur der Belastingen”, mr Croes a sigui bisa. Ora cu a puntra e abogado si e la wak e carta, e abogado a contesta” Claro!. Como abogado di Mike de Meza, mi mester wordo informa di biaha, cu e tin un abogado na e otro banda. Semper ta asina” e abogado a finalisa bisando. 

KEN A APROBA 

E pregunta ta keda awor, ken a aproba pa mr Murray bira e abogado, y pakico e partido berde ta desmenti e noticia. Manera cu noticiacla a raporta algun rato pasa den un ‘clarificacion’, cu gobierno a desmenti cu nan a aproba pa Murray bira e abogado pa DIMP y cu ta gobierno ta esun cu tin cu autorisa esaki.