Update: Gobierno ta desmenti cu abogado di Corsou ta defende DIMP otro siman contra De Meza

ORANJESTAD – Gobierno di Aruba diamars anochi a desmenti cu a aproba pa un abogado di Corsou, mr Mirto Murray defende e departamento di impuesto, DIMP contra parlamentario Mike de Meza otro siman den corte na Aruba. Anteriormente e portal 24ora.com a raporta cu Murray lo a haya aprobacion di parti di gobierno y cu parlamentario pa partido berde, Mike de Meza, no ta nada contento cu e noticia aki. Ademas, segun e portal 24ora.com, de Meza a informa nan cu e ta hopi malcontento cu e situacion awor, y cu esaki ta bay bira un problema. Noticiacla mientrastanto a compronde diamars cu localmente tabatin lobbymento formal entre abogadonan pa haya e caso aki pa defende DIMP, pero no a logra. E abogado cu lo a haya e trabou, ta esun di Corsou, mr Mirto Murray. “Nos ta cla p’e” abogado Desiree Croes a bisa Noticiacla diamars atardi. Mas aleu, e portal 24ora.com ta sigura cu e abogado di Corsou a entrega un carta na Corte di husticia, sigurando cu e ta e abogado pa e caso. 

MURRAY

Tabata mas tempran cu e portal 24ora.com a raporta cu  DIMP lo a pidi minister encarga cu e departamento, Geoffrey Wever pa busca e abogado di Corsou, ya cu e ta esun mas ‘versa’ riba e tereno aki. Wever, lo a pidi conseho di minister aprobacion pa esaki, y lo a haye tambe. Sinembargo mas anochi, e portal en cuestion (24ora.com) mester a coregi su informacion unda cu a papia cu minister Geoffrey Wever, cu a desmenti e informacion duna, y cu e no a aproba ni conseho di minister a aproba esaki. Noticiacla mes no por a confirma esaki. Abogado di de Meza si a confirma pa noticiacla cu Murray berdad ta e abogado.  Murray a lanta su bufete Murray, Attorneys at Law na 2017, y ta specialisa den varios tipo di caso, incluyendo e tema cu tin esta, ley fiscal. E caso ta tuma lugar otro siman diaranson mainta 11:30am.