Oduber na Eman: Ken ta responsabel pa cua cartera?

ORANJESTAD - Mirando tur e desaroyonan di Gobernacion di AVP-FUTURO, Fraccion di PPA a dicidi pa manda un carta pa Prome Minister Mike Eman, pa contesta parlamento ken ta e ministernan responsabel legalmente pa cua cartera. “Nos tur ta bon na altura, cu conforme e LIM (Landsverordering Instelling Ministerie) actual, e ministernan no ta cargando e responsabilidad legal cu e ordenanza ta indica, ya cu nan a cambia e ministerionan completamente y ta duna mandato na otro asina sin mas” e lider di fraccion di e partido PPA, Otmar Oduber ta bisa den un comunicado. . 

Segun   Oduber: “Un ehempel cla di esaki ta, por ehempel sra. Gerlien Croes ta pretende di ta e minister cu ta atende cu e Asuntonan di Reino, pero realidad ta cu ta Prome Minister Eman ta reuni cu e ministernan concerni riba e topico aki. Riba dje ta minister di finanzas ta esun cu ta reuni riba e topico di ‘Rijkswet’ y e minister responsabel mes, segun particion di cartera pa e formacion di gobierno, no tin e cuadra legal pa asumi e responsabilidad”. Parlamento simpelmente kier claridad y p’esey a dicidi pa manda e preguntanan aki pa Prome Minister en cuestion. 

Segun Odunber, ta interesante pa sa con Prome Minister Eman ta atende cu e asunto aki y si e ta dispuesto pa para responsabel politicamente na Parlamento pa su Gabinete, na ken el a duna mandato of si e ta bay realmente respeta e ley y laga cada minister eherce su responsablidad conforme e LIM bieu. “E preocupacion mas grandi di fraccion di PPA ta, cu door di tin un diferencia di opinion riba e topico di Rijkswet, unda cu e dos partnernan di coalicion no ta riba mesun linea, ta interesante pa sa con e gobierno aki lo anda cu e topico aki. “Eman a indica claramente den e sala di Parlamento, cu e ta haya e Rijkswet anticonstitucional, cual opinion nos tambe ta comparti y di otro banda nos sa cu e otro partido, ta cla pa entrega tur lucha y sacrificio contal cu nan haya placa, sin sikiera importa e condicionnan cu esaki tin. Simpelmente, Parlamento ainda no sa ken ta legamente responsabel!”, e parlamentario a finalisa bisando. Pa lesa e carta, click AKI