Gobierno cu un di dos intento pa retira RvC di aeropuerto otro siman

ORANJESTAD – Tur cos ta mustra cu otro siman, gobierno (lesa:Wendrick Cicilia) kier haci un di dos intento pa purba retira e hunta di Comisario di aeropuerto (AAA NV). E hunta di Comisario di aeropuerto (AAA NV),  mientrastanto a sobrevivi e ‘prome intento’  despues cu siman pasa e reunion cu mester a sirbi pa retira nan, no a ‘logra’ su meta. Mientrastanto noticiacla a compronde cu otro siman diabierna tin un reunion ‘nobo’, unda cu e intencion atrobe ta pa retira e hunta di Comisario, e biaha aki. Mientrastanto, e hunta di Comisario ainda ta ‘na bida’. Noticiacla a compronde cu e hunta, a recorda cu nan trabou ta pa supervisa e gerencia di aeropuerto, y no sinta n abanda, bati man. 

RETIRO

Tabata e prome siman di e luna aki cu cos a coy un buelta diferente na AAA NV, ora cu a bira conoci cu gobierno kier a kita e hunta completo y reemplasa nan. Mientras cu e ta un practica cu ta sosode frecuente ora cu tin cambio di gobierno, ta parce e biaha aki cu e forma con esaki a sosode, ta considera esaki algo contra ‘good governance’, osea bon gobernacion. Sigur e forma con esaki a sosode. Noticiacla manera raporta inicialmente, a compronde cu algun di e miembronan no a aprecia e forma cu esaki a sosode, esta con nan a haya e notificacion cu a 'retira' nan. E momento ey minister responsabel pa aeropuerto, Wendrick Cicilia a confirma pa e portal aki (noticiacla) cu a sali un invitacion pa e miembronan actual (y management team interino:red) pa un reunion general (Algemene Vergadering van Aandeelhouders) pa trata e tema. 

E REUNION

E reunion (AVA) tabata yama pa diaranson mainta siman pasa  9’or na Cocolishi, unda cu e intencion tabata pa akinan, retira e cuater miembronan di hunta di comisario, y nombra e cuater miembronan nobo. E intencion segun e invitacion tabata ‘ pa otorga e miembronan actual un retiro honorabel, cu danki pa nan servicionan'. Despues ta presenta e cuater miembronan nobo. Un di e miembronan nobo, ta e actual chief of staff di e minister en cuestion mes, mientras cu un di nan ta miembro di directiva di ATA, y un otro tabata un miembro di e hunta di Triple A NV den pasado caba, y uno ta un mericano cu experiencia den aviacion, cu den pasado tambe tabata parti di e hunta. No ta conoci si e ultimo aki, lo ta e representante pa Royal Schiphol Group, mirando cu nan a pidi pa un asiento den e hunta nobo aki tambe y a forma parti di e MoU reciente firma. 

E PROBLEMA

Noticiacla a compronde cu e problema ta cu tin discordia pa e forma cu e reunion a wordo yama. E miembronan actual a ricibi un email ‘apenas’ diabierna atardi laat, cu e invitacion pa ta presente, ni un siman despues, esta diaranson mainta awor, unda cu nan ta haya nan retiro. Publicamente mientrastanto, e minister anterior responsabel pa aeropuerto, actual parlamentario Dangui Oduber, mester a protesta e acto aki, y ta tilda e minister actual di hunga politica, y ta nombra hende nobo, pa por haya aprobacion pa Royal Schiphol Group por drenta bek, ya cu e hunta anterior, no tabata di acuerdo. Cu e cambio aki, e ta habri caminda pa e cambio awor tuma lugar. Di otro banda, mester bisa cu ta basta ‘normal’, cu un gobierno ta actua asina, unda cu ta prefera pone su hendenan di ‘confiansa’ na e posicionnan aki. Oduber a bisa riba esaki, cu den su caso, no a ‘retira’ e hunta ora cu e la subi, sino a duna nan opcion pa dicidi kico nan kier a haci. Segun e ex minister, e hunta e tempo ey a dicidi di retira nan mes.