KLM ta spera mas cancelacion debi na mantencion di su avionan tipo Boeing 787

SCHIPHOL - KLM ta premira di tin cu cancela varios vuelo den e proximo simannan cu lo wordo opera cu un Boeing 787. Segun un vocero, esaki lo por encera algun vuelo pa dia, pero e compania no por duna cifranan exacto. Esaki ta wordo evalua riba un base diario.

E motibo ta mantencion acelera di un cantidad di Boeing 787 den e flota di KLM. Durante mantencion anterior, e procedura corecto no a wordo sigui riba cierto componentenan riba shete di e aparatonan ey. E compania ta spera cu gradualmente e avion por wordo poni bek den servicio despues di e mantencion adicional. “Nos ta trahando caba riba e prome tres avionnan”.

Segun KLM, pasaheronan riba vuelonan cancela lo wordo rebook riba un otro vuelo. Esaki tambe por ta un buelo di un otro compania di aviacion. Algun vuelo di Boeing 787 tambe lo wordo opera cu un Boeing 777.

Segun KLM, esaki ta regarda mantencion di un piesa cu ta wordo usa durante recargamento di e avion. "Aunke e parti aki ta identico na esun di e Boeing 777, pa cual e procedura ta corecto, diferente instruccion ta aplica pa e modelonan 787. P’esey KLM a dicidi di realisa e trabounan di mantencion riba e shete avionnan 787 afecta mas lihe posibel di acuerdo cu e regulacionnan corecto," e compania a bisa.

KLM tin un flota di 228 avion. Di esakinan, 24 ta Boeing 787, cu ta wordo usa mundialmente pa destinacionnan di distancia largo.