E siman aki e conclave pa scohe Papa nobo ta cuminsa

CIUDAD VATICANO - Dos dia mas y e conclave lo cuminsa. Entrante diaranson atardi, 133 cardenal di 71 pais lo purba yega na e mayoria di dos tercera parti di 89 voto pa eligi e sucesor di Papa Francisco.

Pa 108 di nan ta prome biaha cu nan ta participa den un conclave. E cardinalnan aki a wordo nombra pa Francisco. Esaki no ta nifica, sinembargo, cu nan tur tin e mesun ideanan tocante ken mester dirigi e iglesia awor.

E biaha aki ta parce cu no tin candidato cu ta destaca, manera tabata e caso na 2005 den e conclave despues di e papado di 26 aña di Juan Pablo II. E tempo ey, e cardinal aleman Joseph Ratzinger tabata e faborito absoluto y a wordo eligi rapidamente como Benedicto XVI.

Na 2013, aparentemente tabatin dos contendiente: un italiano y un cardinal brasileño. Pa sorpresa di hopi, un persona pafo, e argentino Jorge Mario Bergoglio, diripiente a bira e papa nobo. Despues a resulta cu e tabata un candidato rival di Ratzinger kaba na 2005, pero e tempo no tabata madura ainda pa un cambio di rumbo.

Como Francisco, e no solamente a inicia un reforma di Iglesia, el a cambia tambe radikalmente e composicion di e Colegio di Cardinalnan. Mientras cu Europa sigur tin un cantidad significante di cardinal y un cantidad relativamente grandi di italiano (17 mas dos cu no ta na Italia), e peso di Asia (y Medio Oriente) y Africa a aumenta.

Un papa asiatico pues lo no ta impensabel. Of un hende cu diripiente ta destaca asina tanto durante e reunionnan den e periodo pre-conclave cu e ta logra recohe voto casi for di ningun caminda.

Esakinan ta, den ordu alfabetico, e cardinalnan cu ta parce di tin e miho chens.

Mario Grech (68), Malta. 

Cristóbal López Romero (72), Arzobispo di Rabat, Marocco, originalmente di Spaña.  

Pietro Parolin (70), Italia.    

Pierbattista Pizzaballa (60), Italia.  

Robert Prevost (69), Merca.  

Luis Antonio Gokim Tagle (67), Filipinas.