Analisis : “Ken a logra kico’

Scirbi pa Tito Laclé

E siman aki tabata ‘atrobe’ politicamente carga cu informacion. Cu e siman a wordo corta cu un dia liber y un ATV pega su tras, haciendo e un siman cortico, no a stroba e causa, pasobra ambos tema cu mi ta bay trata, a sosode prome cu e dia liber.  E tema  politico ‘principal’ esta si Mike de Meza ta bira minister of no, aunke e no mester a haya e atencion asina grandi, a haya un lugar secundario un rato, trahando lugar pa ‘logronan grandi’ manera pago di 250 florin pa pensionado y e adaptacion ‘atrobe’ di e lista positivo di remedi. Y atrobe, e ta ilustra con politica partidista y tradicional ta sigui fuertemente na nos isla, ‘lamentablemente’. 

E prome tabata e famoso promesa di campaña di e partido berde, unda cu tur pensionado ta haya 700 florin extra den nan saco den e prome 100 dia di gobierno AVP-FUTURO. A resulta cu e pensionado mester a keda contento cu apenas 250 florin, y mester warda pa e resto di e 450 florin ora cu ‘por’ paga esaki realmente. Y aki ta unda e prome problema a cuminsa. Tabata hopi tempran despues di a gana e eleccion, cu e partido cu tanto a haci e promesa di strooi cu 700 florin,  mester a  compronde cu e promesa no ta bay wordo cumpli. E dicho di ‘campaña ta un, goberna ta otro’ ta sigui persigui nos. E partido mester a busca un forma pa spin esaki mesora, y e gabinete anterior a ‘yuda’ nan indirectamente cu esaki. Net prome cu nan a baha, a opta pa unilateralmente revisa un parti fiscal, unda cu un grupo di ciudadano no mester paga cierto impuesto mas. Hopi a considera esaki como un ‘cheap shot’ y no elegante di e gobierno saliente. E ‘move’ aki a ‘come’ di e placa cu e gabinete nobo lo mester a usa pa financia e 700 florin pa luna extra cu nan a priminti durante campaña. “Ta e gabinete anterior a stroba nos” tabata e gritonan cu por a tende. Otro spin, ta pa splica cu ‘algo ta algo’, y a bisa esaki suficientemente cu hasta esnan cu a spera y angela pa nan aumento, a keda ‘satisfecho’ y nan mes a cuminsa grita cu ‘algo ta algo’, y ‘miho algo cu nada’. Algun lo bisa, cu mi ta buscando pieuw aki. Porta, pero loke mi kier ilustra, ta cu ni con bo bira e cuenta, e berdad ta cu e partido berde a haci un promesa ambicioso cu a dune hopi mas voto y consecuentemente e derecho awor pa goberna. Sin e promesa aki, mi ta duda cu e lo a haya e resultado menciona. Si e la priminti un aumento di 250 florin ‘so’, mi ta sigur cu e lo no a haya e cantidad di voto cu e la haya. Enfin. Algo ta algo. Y como cu nos tin un pueblo ‘complaciente’, e partido pa aworaki ta ‘off the hook’, y lo ‘wak’ con y di unda lo saca e otro 450 florin. Mi pensamento ta cu e resto lo no bin, y si e bin, e ta reparti riba un periodo mucho mas largo cu  100 dia. E lider politico a bisa caba, cu no ta importante con e ta bin, basta e bin. Si ta den 100 dia of no. Y nos ta ok cu esey, ta parce. E gabinete anterior  no a perde pa gana, y mesora a purba capitalisa riba e ‘logro’ aki. Ta manera cu nan no kier laga los y ta gobernando ainda.  ‘Si no tabatin surplus, no por a duna 250 florin’, ta un grito cu un ex minister a cuminsa grita mesora, pa e no keda atras. Mi punto ta, cu sinembargo, ningun momento riba ningun presupuesto di nan, tabatin poni pa duna 250 florin na pensionado. Y ora cu nan tabatin e chens, a duna ‘solamente 30 florin extra. Cu no tabatin fondo, ta un realidad, pero tambe ta un realidad cu nan NO a pone e suma riba presupuesto y e gabinete aki SI.. Pues, aki e gabinete anterior kier crea un impression cu no ta di nan. Nan a simplemente hunga politica, barata, pero ya politico nan ta, y a haci politica, pa nan no keda atras. Y si,  250 florin ta mas cu nada. Y mi ta spera cu e suma extra, realmente ta wordo bon inverti. Pasobra a bisa tambe cu maske cuanto bo subi salario cu esaki y esaya, bo ta djis yuda e ciudadano di gasta mas, na cosnan cu e no mester. 

Ta sigui e di dos ‘logro’, depende cua banda di e liña bo ta, cu ta cu pensionadonan ta haya un cantidad di remedi bek riba e lista positivo, cu ta nifica cu nan no tin cu paga pa nan mas. Aki tambe, a haci un sin fin di politica. Si aworey mi a critica e oposicion pa e forma con nan a maneha e parti di e 250 florin, e biaha aki tin cu critica e gabinete actual. Pasobra e biaha aki, nan tabata robez. E gabinete anterior ta esun cu a anuncia for di aña pasa cu nan lo ahusta e lista positivo, debi cu e situacion financiero di AZV ta duna espacio pa esaki. Gobierno nobo a sinta, di otro signatura, y a simplemente continua cu e plan y a ‘ehecuta’ esaki. Pero  esaki no ta algo di e gabinete actual sino esun anterior. Cu e gabinete anterior a kita e remedinan anteriormente, ta berdad. Pero e motibo tabatey tambe. Hulanda a impone un corte financiero di 60 miyon. Y un di e formanan pa logra esaki, tabata pa haci esaki den e parti di remedi. Ta keda e discussion si ta Hulanda a impone esaki of si ta gobierno di Aruba a opta pa scohe pa aplica e medida aki, riba e remedinan of no. Ta un hecho, cu Aruba mester a haci un cortamento severo. Fast forward na e siman aki, e gabinete nobo aki a pinta e cos como algo cu den apenas 4 siman di tempo cu nan a sinta, nan a logra. Algo cu no ta berdad. Y mesora e gabinete anterior, e biaha aki si corectamente, a recorda tur hende, cu e gabinete actual ta pronkia cu pluma di otro. 

100 DIA

Loke mi kier sugeri, ta pa laga e gabinete aki traha, y despues di nan prome 100 dia, usa esaki pa analisa esaki criticamente, y duna elogio unda cu mester, y critica (cu echos) unda cu mester. Pero subi cabay di critica cada minuut, awor, no ta productivo. Esaki ta bay pa ambos banda. Esun cu ta goberna, haci bo cos, y produci loke bo a priminti, sea ta bon of malo. Pero cumpli cu loke bo a priminti e pueblo. Y oposicion, opone loke merece oposicion. Tene tur hende honesto y skerpi. Pero, laga e gobierno traha. Ora cu e 100 prome dianan yega, analisa y djey opone loke merece opone. E forma di actua awor, di ambos banda, ta ‘cansa caya’, y ta crea solamente division, odio y rencor. Aruba merece miho.